पोखरा — एनआरटीलाई सडन डेथमा हराउँदै चर्च ब्वाइज युनाइटेड पोखरामा जारी २४ औं आहा–रारा पोखरा गोल्डकप फुटबलको क्वाटरफाइनल पुगेको छ । पोखरा रंगशालामा बिहीबार निर्धारित र अतिरिक्त समय १–१ को बराबरीमा टुंगिएपछि खेल पेनाल्टी शुटआउट हुँदै सडनडेथसम्म पुगेको हो । 

पेनाल्टी शुटआउटमा चर्च ब्वाइजका गोलरक्षक टिकेन्द्रसिंह थापा नायक बने । उनले तीन पेनाल्टी रोक्दा चर्च ब्वाइजले क्वाटरफाइनलमा स्थान सुरक्षित गर्‍यो । निर्धारित ९० मिनेट १–१ को बराबरीमा टुंगिएपछि अतिरिक्त समयमा धकेलियो । अतिरिक्त ३० मिनेटको समयमा दुवैतर्फबाट गोल हुन सकेन । पेनाल्टी शुटआउट ४–४ को बराबरीमा टुंगिएपछि सडन डेथको सहारा लिनुपर्‍यो । 

पेनाल्टी शुटआउटमा चर्च ब्वाइजका नवीन लामा, मिलन राई, अकिन्स बाफोउर र अबायोमी फाकुन्लेले गोल गरे । सकल रेग्मीको प्रहार पनि क्रसबार माथिबाट बाहिरियो । एनआरटीका कप्तान अञ्जन विष्ट, जय गुरुङ, सुमित श्रेष्ठ र गोलकिपर विशाल सुनारले गोल गरे । 

एन्जल महर्जनको प्रहार बाहिरियो । सडन डेथमा चर्च ब्वाइजका प्रशान्त लक्षमले गोल गरे । त्यसपछि एनआरटीका राजीव लोप्चनले गोल फर्काएर बराबरी गरे । चर्च ब्वाइजका सर्ज ढिकाको पेनाल्टी एनआरटीका गोलरक्षक विशाल सुनारले बचाए । एनआरटीका जन्मजय धामीको बल चर्च ब्वाइजका टिकेन्द्रसिंहले बचाए ।