सुनसरी — धरानमा जारी २५औं संस्करणको अन्तर्राष्ट्रिय आमन्त्रण बुढासुब्बा गोल्डकप फुटबल प्रतियोगिताको सेमिफाइनल खेल आजबाट सुरु हुँदैछन् ।
पहिलो सेमिफाइनलमा आज भुटानको आरटीसी फुटबल क्लब र ए डिभिजन लिग च्याम्पियन चर्च ब्वाइज युनाइटेडबीच प्रतिस्पर्धा हुँदैछ । धरान रंगशालामा खेल दिउँसो सवा तीन बजे सुरु हुनेछ ।
चर्च ब्वाइजले क्वाटरफाइनलमा विभागीय टोली नेपाल पुलिस क्लबलाई पराजित गर्दै सेमिफाइनल खेल्न लागेको हो । भुटानी टोलीले राष्ट्रिय जागृती क्लब इटहरीलाई पराजित गर्दै चर्च ब्वाइजसँगको सेमिफाइनल भिडन्त पक्का गरेको थियो ।
दोस्रो तथा अन्तिम सेमिफाइनलमा बिहीबार साविक विजेता न्युरोड टिम एनआरटी र भारतको युनाइटेड खर्साङ फुटबल क्लब युके एफसीबिच हुनेछ । एनआरटी अन्तिम क्वाटरफाइनल खेलमा झापाको काँकडभिट्टा फुटबल ट्रेनिङ सेन्टरलाई ३–१ गोल अन्तरले पराजित गर्दै सेमिफाइनल प्रवेश गरिसकेको छ ।
युकेएफसीले आयोजक धरान फुटबल क्लबलाई पराजित गर्दै एनआरटीसँगको सेमिफाइनल भेट पक्का गरेको हो । फाइनल खेल शनिबार हुनेछ । गोल्डकपको विजेताले १० लाख रुपैयाँ तथा उपविजेताले पाँच लाख रुपैयाँ पुरस्कार प्राप्त गर्नेछन् ।
