पोखरा — आहा–रारा पोखरा गोल्डकप फुटबलमा सर्वाधिक सफल र अनुभवी टिम नेपाल पुलिस क्लबले २४ औं संस्करणमा विजयी सुरुआत गरेको छ । पोखरा रंगशालामा मंगलबार आयोजक सहारा क्लबलाई १–० ले स्तब्ध पार्दै पुलिसले क्वाटरफाइनल यात्रा तय गरेको हो ।
उद्घाटन खेलमा उज्ज्वल राईको गोल मद्दतमा ६ पल्टको उपाधि विजेता पुलिस क्वाटरफाइनल पुगेको छ । खेलको ३७ औं मिनेटमा पाएको कर्नरको सदुपयोग गर्दै उज्ज्वलले पुलिसलाई अग्रता दिलाए ।
उनको देब्रे खुट्टाको प्रहारले सेकेन्ड बार नजिकैबाट जाली चुम्दै सानदार गोलमा परिणत भएको थियो । उनी प्लेयर अफ द म्याच घोषित भए । यसअघि झापा–११ बाट समेत खेलेका उनी दुई वर्षदेखि पुलिससँग आवद्ध छन् ।
पुलिसले माघ २६ मा ब्रिगेड ब्वाइज क्लब यूकेसँग क्वाटरफाइनलमा प्रतिस्पर्धा गर्नेछ । तीन विदेशी खेलाडी र आफ्नै एकेडेमीका खेलाडी लिएर मैदानमा उत्रिएको सहारा यसपल्ट पहिलो खेलमा हार बेहोरेसँगै प्रतियोगिताबाट बाहिरिएको छ । आहा–रारामा पुलिस र सहाराबीच छैटौं भेटमा पनि आयोजकले जित निकाल्न सकेन । खेलको सुरुआती समयमा केही उत्कृष्ट अवसर सिर्जना गरे पनि सहारा गोल गर्नबाट चुक्यो ।
खेलको सातौं मिनेटमा सहाराका अफ्रिकी मूलका खेलाडी आर्नोल्डको पासमा अर्का विदेशी खेलाडी विलियम सेसेगननले सिक्स यार्ड बक्सबाट प्रहार गरेको बललाई पुलिसका गोलकिपर शत्रुधन चौधरीले उत्कृष्ट बचाउ गरे । खेलको १७ औं मिनेटमा पुलिसले अवसर खेर फाल्यो । सुजन मगरले मिलाइदिएको पासमा विवेक पाण्डेको प्रहार बाहिरियो । खेलको २४ औं मिनेटमा सहाराले अर्को अवसर गुमायो । सेसेगननको पासमा सन्तबहादुर गुरुङको पावरसट क्रसबारमाथिबाट बाहिरिन पुगेको थियो ।
प्रतियोगिताको उद्घाटन पोखरा महानगरपालिकाका प्रमुख धनराज आचार्यले गरेका थिए । सहारा क्लबले यस वर्षको उत्कृष्ट राष्ट्रिय फुटबल खेलाडी सम्मान सनिश श्रेष्ठलाई प्रदान गरेको छ । उद्घाटन समारोहमा उनलाई ५० हजार ५ सय ५५ रुपैयाँसहित क्लबले सम्मान गरेको हो ।
