सुनसरी — आयोजक धरान फुटबल क्लबलाई पराजित गर्दै युनाईटेड खर्साङ फुटबल क्लब युकेएफसी २५ औं संस्करणको अन्तर्राष्ट्रिय आमन्त्रण बुढासुब्बा गोल्डकपको सेमिफाइनलमा प्रवेश गरेको छ । 

धरान रंगशालामा आइतबार भएको दोस्रो क्वाटरफाइनलमा पाहुना टोली युनाईटेड खर्साङ फुटबल क्लबले आयोजक धरान फुटबल क्लबलाई सडेन डेथमा ७–६ गोल अन्तरले पराजित गर्दै सेमिफाइनलमा स्थान सुरक्षित गरेको हो । निर्धारित समयमा दुवै टिमबाट १–१ गोलको बराबरी भएपछि समय अभावका कारण खेलको निर्णय सिधै पेनाल्टी सुटआउटबाट लिइएको थियो । पेनाल्टी सुटआउटमा दुवै टिमबाट ५–५ गोल भएपछि खेल सडेन डेथमा धकेलिएको थियो । सडेन डेथमा धरानका मनोज राईको प्रहार खेर जाँदा युकेएफसीका हेमराज भुजेलको प्रहारले जाली चुमेपछि पाहुना टोली सेमिफाइनलमा स्थान सुरक्षित गर्न सफल भएको हो । त्यसअघि निर्धारित समयको १८ औं मिनेटमा भुजेलको गोलबाट यूकेएफसीले अग्रता लिएको थियो । तर खेलको ४० औं मिनेटमा आयोजक क्लबका विनोद राई गोल फर्काएपछि खेल १–१ को बराबरीमा आएको थियो । पहिलो हाफमा १–१ को बराबरी खेलेका दुवै टिमबाट दोस्रो हाफमा गोल हुन नसकेपछि खेल पेनाल्टी सुटआउट हुँदै सडेन डेथमा धकेलिएको थियो ।