बागमतीका लागि सेने एलेक्सको प्रहार गोलमा परिणत गरेपछि संकटका लागि सुनील खड्काले गोल गरे र टिम फेरि अगाडि नै रह्यो । गौरव श्रेष्ठको अन्तिम प्रहार दीपले जोगाएपछि संकटाको जितको औपचारिकता पूरा भएको थियो । यही प्रदर्शनका लागि दीप प्रतियोगिताकै उत्कृष्ट खेलाडी पनि चयन भए । सान्त्वना पुरस्कार भने विकेशको नाममा रह्यो । उनी रहे, प्रतियोगिताका उत्कृष्ट गोलरक्षक । यो एक प्रकारले स्वाभाविक पनि थियो किनभने दुवै टिम सेमिफाइनलमा पेनाल्टी सुटआउटमा जित्दै फाइनल पुगेका थिए ।

‘हामीले सुरुदेखि आक्रामक भएर खेल्ने रणनीति बनाएका थियौं । दोस्रो हाफमा पनि त्यसलाई कायम राख्यौं । तर हाम्रो विङ्गर चलेन,’ संकटाका प्रशिक्षक रवीन्द्र शिलाकारले भने । उनी के मान्छन् भने संकटा उपाधिका लागि पूर्णतः हकदार भने थियो किनभने प्रतियोगितामा संकटाले राम्रो खेलेको थियो । फाइनलमै पनि खेलमाथिको पकड संकटाकै पक्षमा रहेको थियो । 

संकटा गोलका केही निश्चित अवसरमा चुकेको थियो ।

‘हामीले पछिल्लो केही समय लगातार फुटबल खेलिरहेका छौं । चाहे त्यो यू–१६ र यू–१८ होस् अथवा महिला लिग नै । हाम्रो पुरुष टिमले पनि लगातार खेलिरहेकै छ । हामी चुप रहेनौं । त्यसकै पुरस्कारका रूपमा हामी आज च्याम्पियन भएको हुनुपर्छ,’ प्रशिक्षक शिलाकारले थपे । बागमतीका प्रशिक्षक प्रकाश वैद्यले आफ्नो टिमलाई भाग्यले साथ नदिएको बताए । उनको भनाइ थियो, ‘टाइब्रेकरमा भाग्य जसको पक्षमा पनि हुन सक्छ । अन्यथा समग्रमा प्रतियोगितामा हाम्रो प्रदर्शन राम्रै रह्यो ।’