काठमाडौँ — एपीएफ नेपाली महिला फुटबलको लिगमा फेरि च्याम्पियन भएको छ । डिफेन्डिङ च्याम्पियन एपीएफले बुधबार दशरथ रंगशालामा भएको प्ले–अफ फाइनलमा पुलिसलाई ४–० ले हरायो । पूरा प्रतियोगितामा एपीएफले कुनै पनि खेल गुमाएन र अपराजित हुँदै उपाधि जितेको हो ।

लिगको पहिलो र दोस्रो चरण दुवैमा एपीएफ नै शीर्ष स्थानमा रहेको थियो । यसपल्टको लिगमा एपीएफको यो लगातार १८ औं जित हो ।

पुलिसले पहिलो हाफमा एपीएफलाई गोलरहित बराबरीमा रोके पनि त्यसलाई पछि कायम राख्न सकेन । एपीएफका लागि सविता रानागमरले दुई तथा सरु लिम्बू र अनु लामाले एक गोल गरे ।

सविताले ६४ औं मिनेटमा सुरुकै पासमा गोलको खाता खोलिन् । सरु आफैले ६९ औं मिनेटमा दोस्रो गोल गरिन् । रेनुका नगरकोटेको सुरुआती प्रहार पोस्टमा ठोकिएर फर्केपछि त्यसमै सुरुले निर्णायक प्रहार गरेकी हुन् ।

सविताले ८३ औं मिनेटमा आफ्नो दोस्रो तथा टिमको तेस्रो गोल गरिन् । प्रीति राईले उपलब्ध गराएको पासमा सविताले गोल गरेकी हुन् । दोस्रो हाफको इन्ज्युरी समयमा अनुले चौथो गोल थपिन् ।