काठमाडौँ — ढाका विश्वविद्यालयको विजयसँगै जय नेपाल कप दक्षिण एसियाली विश्वविद्यालय टी–२० क्रिकेट प्रतियोगिताको समीकरण पूरा भएको छ । ढाका लगातार तेस्रो खेल जित्दै समूह ‘ए’ को विजेताका रूपमा नकआउट चरण पुगेको हो ।

ढाकाले आइतबार बाबासाहेब भीमराव बिहार विश्वविद्यालयलाई ७ विकेटले पराजित गर्‍यो । ढाकाको विजयले त्रिभुवन विश्वविद्यालयको पनि सेमिफाइनलमा स्थान सुरक्षित गर्‍यो । ढाकाले ३ र त्रिविले २ खेलमा विजय हात पारेका हुन् । बिहारले १ खेल मात्र जित्न सक्यो भने पूर्वाञ्चल विश्वविद्यालय सबै ३ खेलमा पराजित रह्यो ।

ढाकाले सोमबार हुने पहिलो सेमिफाइनलमा लखनउ विश्वविद्यालयसँग तथा त्रिविले मध्यपश्चिम विश्वविद्यालयसँग खेल्नेछ । समूह ‘बी’ मा मध्यपश्चिमले सबै ३ खेल जितेको थियो भने लखनउले २ खेलमा विजय हात पारेको थियो । काठमाडौं विश्वविद्यालयले १ खेल मात्र जित्न सक्यो भने दिल्ली विश्वविद्यालयले कुनै खेल जित्न सकेन ।