धनगढी — धनगढीस्थित फाप्ला क्रिकेट मैदानमा सञ्चालन हुन गइरहेको अर्जुन ट्रफी राष्ट्रिय क्रिकेट प्रतियोगिताको खेल तालिका सार्वजनिक गरिएको छ । प्रतियोगितामा सहभागी हुने आठ टिमलाई दुई समूहमा विभाजन गर्दै बिहीबार तालिका सार्वजनिक गरिएको गो ड्रिमर्सले जनाएको छ । 

माघ १९ देखि सञ्चालन हुने उक्त प्रतियोगिताको समूह ‘ए’ मा डीसीए धनगढी, फ्रेन्ड्स युवा क्लब डडेल्धुरा, घोडाघोडी–११ सुख्खड कैलाली र बोस्टन क्रिकेट झापा रहेका छन् । समूह ‘बी’ मा सीवाईसी अत्तरिया, दशरथ चन्द एकेडेमी बैतडी, क्रिकेट एक्सिलेन्स सेन्टर काठमाडौं र न्यू होराइजन बुटबल रहेका छन् ।

प्रतियोगिताअन्तर्गत माघ १९ गते डीसीए धनगढी र फ्रेन्ड्स युवा क्लब डडेल्धुराबीच उद्घाटन खेल हुने गो ड्रिमर्सका अध्यक्ष सुवास शाहीले जानकारी दिए । उनका अनुसार माघ २६ गते पहिलो सेमिफाइनल, माघ २७ गते दोस्रो सेमिफाइनल र माघ २८ गते फाइनल खेल हुनेछन् । पहिलो सेमिफाइनल खेलमा समूह ‘ए’ को विजेता र समूह ‘बी’ को उपविजेताबीच फाइनल प्रवेशका लागि खेल हुनेछ । दोस्रो सेमिफाइनलमा समूह ‘बी’ को विजेता र समूह ‘ए’ को उपविजेता फाइनल प्रवेशका लागि खेल्नेछन् । ‘प्रतियोगिताका सम्पूर्ण खेलहरू धनगढीस्थित फाप्ला क्रिकेट मैदानमा हुनेछन्,’ शाहीले भने ।