काठमाडौँ — नेपालले आईसीसी यू–१९ महिला ट्वान्टी–२० विश्वकप क्रिकेटमा लगातार तेस्रो पराजय बेहोरेको छ । पहिलो पटक महिला युवा विश्वकपमा प्रतिस्पर्धा गरिरहेको नेपाललाई बुधबार अस्ट्रेलियाले ८३ रनले हरायो । यो हारसँगै नेपाल समूह चरणबाटै बाहिरिएको छ । 

पहिलो दुई खेलमा क्रमशः बंगलादेशसँग ५ विकेट र स्कटल्यान्डसँग १ विकेटले पराजित भएपछि नेपालको ‘सुपर सिक्स’ मा पुग्ने सम्भावना कठिन बनिसकेको थियो । समूह ‘डी’ बाट अस्ट्रेलिया सबै तीन खेलमा जितेर ६ अंक, बंगलादेश ४ र स्कटल्यान्ड २ अंक बटुल्दै ‘सुपर सिक्स’ मा पुगेका छन् ।

नेपालले अब प्लेअफका लागि वेस्ट इन्डिज वा आयोजक मलेसियाको सामना गर्नेछ । समूह ‘ए’ मा वेस्ट इन्डिज र मलेसिया पहिलो दुई खेलमै पराजित भएका थिए । बिहीबार यी दुई टोलीबीच हुने खेलको विजेता टोली सुपर सिक्समा पुग्ने छ भने पराजित टोलीले नेपालसँग खेल्नेछ । 

मलेसियाको बांगीस्थित वाईएसडी यूकेएम क्रिकेट ओभलमा टस जितेर ब्याटिङ रोजेको अस्ट्रेलियाले निर्धारित २० ओभरमा ६ विकेट गुमाई १ सय ३९ रन बनाएको थियो । नेपालबाट कप्तान पूजा महतो मैदानमा छाएकी थिइन् । उनले ओपनरद्वय केट पेली र इन्स म्याकोइन तथा विपक्षी कप्तान लुसी ह्यामिल्टनलाई आउट गरेपछि अस्ट्रेलियाले पहिलो ३ ओभरमै ३ विकेट गुमाइसकेको थियो ।