काठमाडौँ — मध्यपश्चिम विश्वविद्यालय र भारतको बिहारको बाबासाहेव भीम राव अम्बेडकर विश्वविद्यालयले बुधबार जय नेपाल कप ट्वान्टी–२० विश्वविद्यालय क्रिकेटमा विजय हात पारेका छन् ।

मध्यपश्चिमले काठमाडौं विश्वविद्यालयलाई १ सय ३४ रन र अम्बेडकरले पूर्वाञ्चल विश्वविद्यालयलाई १ सय ७८ रनले पराजित गरे । टस जितेर ब्याटिङ रोजेको मध्यपश्चिमले कीर्तिपुरस्थित त्रिवि मैदानमा निर्धारित २० ओभरमा ८ विकेट गुमाई १ सय ९२ रन बनायो । रवीन्द्रजंग शाही १२, निश्चल रावल १८ र दीपकप्रसाद डुम्रे ४ रनमा आउट भएपछि राजकुमार शाहले सर्वाधिक ६२ रन बनाए । उनले ३८ बल खेल्दै समान ४ चौका र छक्का प्रहार गरे ।

मनीष थापा १२, सुवास भण्डारी २१ बलमा समान २ चौका र छक्कासहित ३९, दिनेश अधिकारी २, दिवस पुन १० रनमा आउट भए । विपिन खत्री १३ बल खेलेर १ चौका र २ छक्का प्रहार गरी अविजित २७ रन बनाए । केयूका सुप्रिम बस्नेतले ३, ऋषभ खतिवडाले २, दिवश सुवेदी र कप्तान इशान पाण्डेले १–१ विकेट लिए ।