जनकपुर — त्रिभुवन आर्मी क्लब जय ट्रफी पुरुष एलिट कप दुईदिवसीय क्रिकेटमा पूरा ६० ओभर खेल्ने पहिलो टोली बनेको छ । विभागीय टोली आर्मीले बुधबार पहिलो इनिङ्समा तोकिएको पूरै ६० ओभर खेलेर ५ विकेट गुमाई २ सय ७६ रन बनायो । 

प्रतियोगिताको नियमअनुसार पहिलो इनिङ्समा ६० ओभर खेलेपछि इनिङ्स समाप्त हुनेछ । जवाफमा आएको बागमती प्रदेशले पहिलो दिनको खेल टुंगिँदा २२ ओभरमा ५ विकेट गुमाई १ सय २४ रन बनाएको छ । आर्मीभन्दा बागमती अझै १ सय ५२ रनले पछाडि छ ।

मंगलबार रातिको सिमसिमे वर्षा र बिहानको बाक्लो हुस्सुका कारण जनकपुरको रामजानकी बहुउद्देश्यीय रंगशालामा बागमती र आर्मीको खेल ढिलो सुरु भयो । इमरान शेख र तृतराज दासले २४ ओभरभित्र १ सय ३ रनको साझेदारी गरी आर्मीलाई उत्कृष्ट सुरुआत दिलाए । तृतराजले ७८ बलमा ६ चौकासहित ४४ रन बनाए । उनलाई बागमतीका कप्तान सन्दीप लामिछानेले एलबीडब्लू आउट गरे । 

इमरानले भीम सार्कीसँग दोस्रो विकेटमा ५४ रनको साझेदारी गरे । विपिन आचार्यको बलमा रिजन ढकालबाट क्याचआउट हुनुपूर्व इमरानले १ सय ४ बल खेल्दै ११ चौका प्रहार गरी ७२ रन बनाए । आर्मीका कप्तान विनोद भण्डारीले ३ बलमात्र खेलेर सन्दीपको बलमा शुन्यमै आउट भए । बसिर अहमद र भीमले चौथो विकेटमा १ सय २० रनको साझेदारी गरे । 

भीमले ३२ रन बनाए । उनले ५१ बल खेलेर २–२ चौका र छक्का प्रहार गरे । बसिरले नन्दन यादवको ओभरमा लगातार चार चौका प्रहार गरेपछि ४६ औं ओभरमा आर्मी ४ विकेट गुमाई २ सय रनको स्थितिमा पुग्यो । बसिर ६४ बलमा ८ चौका प्रहार गरि ५३ रनमा अविजित रहे । 

सोमपाल कामी ७ रनमै आउट भए । बसिरले कुशल मल्लसँग ६९ रनको अविजित साझेदारी गरे । कुशलले ४३ बल खेल्दै ४ चौका र १ छक्कामा अविजित ३५ रन जोडे । बागमतीबाट विपिन आचार्यले १३ ओभरमा ४५ रन खर्चेर ३ र सन्दीपले २२ ओभरमा १ सय ३ रन खर्चिएर २ विकेट लिए ।