जनकपुर — उद्घाटन खेलमा मधेश प्रदेश घरेलु मैदानमा १ सय २ रनमै अलआउट भएको छ । मधेशको इनिङ्स आइतबार ३५.३ ओभरमै खुम्चिएको थियो । जनकपुरको रामजानकी बहुउद्देश्य रंगशालामा मधेशले कमजोर ब्याटिङ गरेको थियो ।

कप्तान हरिशंकर साह ४ रनमै नन्दन यादवको बलमा आउट भए । सम्हालिएर खेलिरहेका मयन यादवले त्यसको अर्को ओभरमा रिजन ढकाललाई छक्का प्रहार गरेका थिए । मयन र नीरजकुमार यादवको २१ रनको साझेदारीले लञ्च ब्रेकअघि मधेशलाई ११ ओभरमा ३२–१ को स्थितिमा पुर्‍याएका थिए । 

त्यसपछि भने मधेश निकै कमजोर देखियो । बागमती प्रदेशका कप्तान सन्दीप लामिछानेको बलमा मयन २१ रनमा आउट भए । मयनले ३६ बल खेली समान १ चौका र छक्का प्रहार गरे । मयनलाई आउट गरेपछि सन्दीपले एकपछि अर्को विकेट लिन सुरु गरे । उनले एकै ओभरमा नीरजलाई १२ र शाहिल पटेललाई ६ रनमै आउट गरे । 

प्रतिश जीसीले आफ्नो पहिलो बलमै रूपेश सिंहलाई ६ रनमा आउट गरे । सन्दीपको बलमा छक्का प्रहार गरेका विशाल पटेल १६ रन बनाई सूर्य तामाङको बलमा आउट भए । विशाल र अभिषेक तिवारीले सातौं विकेटमा २८ रनको साझेदारी गरे । विशालले २९ बलमा समान १ चौका र छक्कासहित २९ रन बनाए ।

चिया ब्रेकअघि मधेश ३३ ओभरमा ७ विकेट गुमाउँदै ९८ रनमा थियो । चिया ब्रेकपछिको पहिलो ओभरमा प्रदीप पासवान २ रन बनाई सूर्यको दोस्रो सिकार भए । सन्दीपले अभिषेकलाई ११ रनमा आउट गरी आफ्नो पाँचौं विकेट लिए । सूर्यले रञ्जितलाई खाता खोल्न नदिएपछि मधेशको इनिङ्स सस्तैमा टुंगिएको थियो । सन्दीपले १४ ओभरमा ४१ रन खर्चिएर ५ विकेट लिए । सूर्यले २.३ ओभरमा ७ रन खर्चेर ३ तथा नन्दन र प्रतिशले १–१ विकेट लिए ।