काठमाडौँ — इ-स्पोर्ट्स संघ नेपाल (इशान) को वार्षिक क्यालेन्डरअनुसार दोस्रो इ–स्पोर्ट्स राष्ट्रिय च्याम्पियनसिप फागुन दोस्रो साता हुने भएको छ ।

फागुन ८ देखि १० सम्म काठमाडौंमा हुने च्याम्पियनसिपमा ई–फुटबल, मोबाइल लिजेन्ड्स, पब्जी मोबाइल, डोटा–टू, भ्यालोरेन्ट र कस–प्ले गरी ई–स्पोर्ट्सका ६ विधा समावेश गरिएको छ ।

प्रतियोगिताको छनोट चरणका खेल अनलाइनबाट हुनेछ भने अन्तिम चरणको खेलमात्र भौतिक रूपमा काठमाडौंको दशरथ रंगशालामा हुने इशानका अध्यक्ष अन्जन धमलाले जानकारी गराए । अन्तिम चरणमा ई–फुटबलमा ८ खेलाडीले प्रतिस्पर्धा गर्नेछन् । पब्जीमा १६ टिम, मोबाइल लेजेन्ड्समा २, डोटा टू र भ्यालोरेन्टमा ४–४ खेलाडी प्रतिस्पर्धी हुनेछन् ।

इशानले प्रतियोगिताको म्यानेजमेन्ट र मार्केटिङका लागि सप्लाइन अनलिमिटेडसँग तीनवर्षे सम्झौता गरेको छ । सम्झौताअनुसार सप्लाइनअन्तर्गत नेपाल प्लेजले प्रतियोगिताको सम्पूर्ण व्यवस्थापन र बजारीकरण गर्नेछ ।

इशानका अध्यक्ष धमला र नेपाल प्लेजका प्रबन्ध निर्देशक उजेनलाल श्रेष्ठले च्याम्पियनसिप आयोजनासम्बन्धी सम्झौतापत्र आदानप्रदान गरे । अध्यक्ष धमलाले ई–स्पोटर््स विकासमा नेपाल प्लेजसँगको सहकार्यले फाइदा पुग्ने बताए । उनले भने, ‘इ–स्पोर्टस विश्वमै धेरै रिभेन्यु जेनेरेट गर्ने खेल बनिसकेको छ । नेपालमा पनि यसको राम्रो सम्भावना छ ।’

नेपाल प्लेजका प्रबन्ध निर्देशक श्रेष्ठले नेपाली ई–स्पोर्ट्स इतिहासमै यो कोसेढुंगा साबित हुने बताए । ‘हामी ई–स्पोटर््स समुदायलाई जसरी पनि अगाडि बढाउन लागिपरेका छौं । हामी ई–स्पोर्ट्सलाई नेपाली खेलकुदको एउटा माइलस्टोन इभेन्ट बनाउने प्रयासमा छौं,’ उनले लक्ष्य सुनाए । उनले नेपालमा अनलाइन गेमिङ संस्कृति विकास गर्ने र भविष्यमा गेमिङ पनि करियर हो भन्ने स्थितिमा पुर्‍याउने योजना रहेको बताए ।

च्याम्पियनसिपको कुल पुरस्कार राशि २५ लाख रहेको इशानका महासचिव पवन कार्कीले बताए । च्याम्पियनसिपमा भाग लिन चाहने खेलाडीले पुस २० देखि खल्ती एपबाट निःशुल्क नाम दर्ता गराउने सक्नेछन् । च्याम्पियनसिपका लागि कुल बजेट ३ करोड ७० लाख रहेको उजेनलाल श्रेष्ठले जानकारी गराए ।