बुटवल — बुटवलमा जारी मदन भण्डारी गोल्ड कप इन्डो नेपाल पुरुष भलिबल च्याम्पियनसिपको शनिबारको दोस्रो र तेस्रो खेलमा गुजरात भलिबल स्टेट भारत र त्रिभुवन आर्मी क्लबले सहज जित निकालेका छन् । गुजरातले विभागीय टिम एपीएफलाई र त्रिभुवन आर्मीले गल्कोट भलिबल क्लबलाई पराजित गरेका हुन् ।

पहिलो सेट जितेको एपीएफ त्यसपछिका तीनवटै सेटमा लज्जास्पद अंकमै रोकिएको थियो । ‘बी’ पोलबाट खेलिरहेको गुजरातले एपीएफलाई २१–२५, २५–१८, २५–१५, २५–१८ मा हराएको हो ।

गुजरात प्रतियोगिताको दोस्रो दिन भएको खेलमा त्रिभुवन आर्मी क्लबसँग पराजित भएको थियो । दुई खेल विभागीय टिमसँग खेलेको गुजरातले एपीएफसँग सहज जित निकालेको हो । इन्डोर मैदानमा खेल्ने गरेको गुजरातका खेलाडीलाई सुरुको प्रतिस्पर्धामा कठिन देखिएको थियो । तर, शनिबारको एपीएफसँगको खेलमा उनीहरूले धेरै सुधार गरेका थिए । 

शनिबार बुटवलको रामनगरस्थित खेल मैदानमा घाम लागेको थिएन । कठ्याङ्गि्रँदो चिसोमा पनि गुजरातले खेललाई लयमा राखेको थियो ।

त्यस्तै तेस्रो खेलमा त्रिभुवन आर्मी क्लबले सहज जित निकालेको छ । गल्कोट भलिबल क्लबसँग भएको प्रतिस्पर्धामा २५–२१, २५–२३ र २५–१९ को सोझो सेटमा हराउँदै त्रिभुवन आर्मी क्लबले प्रतियोगिताको दोस्रो जित निकालेको हो । ४ इरानी र १ भारतीय खेलाडीसहित प्रतिस्पर्धामा उत्रिएको गल्कोटका खेलाडीले शनिबार उत्कृष्ट प्रदर्शन गर्न सकेनन् ।