मकवानपुर — हेटौंडामा जारी वाग्मती प्रदेशस्तरीय लिग फुटबल प्रतियोगिता–२०८१ अन्तर्गत सोमबार भएको खेलमा विजयी हुँदै सिन्धुली र ललितपुर सेमिफाइनलमा प्रवेश गरेका छन् ।
सिन्धुली जिल्लाको लिग च्याम्पियन ब्लु अल्पाइन क्लबले सिन्धुपाल्चोकको चौतारा स्पोर्टिङलाई २–१ र ललितपुरे टोलीले धादिङको धुनिबेशी युथ समाजलाई ३–१ गोल अन्तरले पराजित गर्दै अन्तिम चारमा स्थान सुरक्षित गरेको हो ।
हेटौंडा–५ स्थित पिप्ले–क्याम्पा रंगशालामा भएको समूह चरणको खेलमा समूह ‘ख’ बाट दोस्रो जीत निकालेको सिन्धुलीले ६ अंक जोडेको छ । सिन्धुलीको तर्फबाट १६ औं मिनेटमा प्रविन महतराले गोल गर्दै अग्रता दिलाएका थिए । खेलको ३० औं मिनेटमा फ्रिकिकमार्फत गोल गर्दै निर्दोष थिङले अग्रतालाई बढाए । सिन्धुपाल्चोक कप्तान भीमबहादुर गुरुङले पेनाल्टीमा गोल गरेपनि टोलीको हार टार्न सकेनन् ।
प्रतियोगिताको दोस्रो संस्करणको लिग चरणमा ललितपुर फुटबल क्लबलाई विजयी गराउन सुवित गुरुङले एक्लैले २ गोल प्रहार गरेका थिए । उनले खेलको २० औं मिनेटमा र ७८ मिनेटमा २ गोल गरेका हुन् । ललितपुरकै अमृत चन्दले थप एक गोल गर्दै टिमका अग्रता फराकिलो बनाएका थिए । धादिङका सूर्यबहादुर गुरुङले मात्र एक गोल फर्काउन सफल भएका थिए । म्यान अफ द म्याच २ गोलकर्ता सुवित घोषित भएका छन् ।
लिगकम नकआउट प्रणालीमा सञ्चालन भएको प्रतियोगितामा ११ जिल्लाको लिग विजेता टिमको सहभागिता रहेको छ । प्रतियोगिताअन्तर्गत बुधबार हुने सेमिफाइनलमा सिन्धुलीले दोलखाको टाइगर टिम तिखाताल र काठमाडौंको चित्लाङ फुटबल क्लब र ललितपुर फुटबल क्लबबीच प्रतिस्पर्धा हुनेछ ।
