'जसले नेपालको नियम, कानुन नमान्ने, खेलकुद ऐन नमान्ने व्यक्तिहरू खेलकुद संघमा बस्न उपयुक्त हुँदैन, त्यसकारण म आग्रह गर्न चाहन्छु, त्यस्तो व्यक्तिलाई कांग्रेसको हरेक पाइलामा ठाउँ नदिन आग्रह गर्दछु'
काठमाडौँ — युवा तथा खेलकुदमन्त्री तेजुलाल चौधरीले नेपाल ओलम्पिक कमिटी (एनओसी) को निर्वाचनमा सहभागी भएका खेलकुद संघहरूलाई कारबाही गर्ने चेतावनी दिएका छन् । मन्त्रालयको निर्देशन नमान्नेहरूलाई कारबाही गर्ने मन्त्री चौधरीले घोषणा गरेका हुन् ।
कांग्रेस निकट नेपाल लोकतान्त्रिक खेलकुद संघको महाधिवेशन केन्द्रीय निर्देशन समितिले आइतबार आयोजना गरेको कार्यक्रममा मन्त्री चौधरीले कानुन नमान्नेहरूलाई कारबाही गर्ने चेतावनी दिएका हुन् । खेलकुद संघका साथै राष्ट्रिय खेलकुद परिषद्लेसमेत मन्त्रालयको निर्देशनको पालना नगरी अघि बढ्न खोजेको भन्दै मन्त्री चौधरी आक्रोशित बनेका हुन् ।
अदालतको आदेश आएपछि नेपाल ओलम्पिक कमिटीको निर्वाचन स्थगित गर्न पत्राचार गरे पनि कमिटीले त्यसलाई अटेर गरेको पनि चौधरीले बताए । ओलम्पिक कमिटीको निर्वाचनमा सहभागी नहुन खेलकुद संघहरूलाई पत्रचार गरेपनि नमानेको भन्दै स्पष्टीकरण पठाइएको मन्त्री चौधरीले जानकारी दिए ।
'हामी कांग्रेसभित्र कस्तो व्यक्ति खेलकुदमा पठाउनुभएको छ, थाहा छैन, कस्तो व्यक्तिहरू महासमितिको सदस्य बन्छ, महाधिवेशन प्रतिनिधि बन्छ, त्यो हामीलाई थाहा भएन । कुन नेताको पकेटबाट को आउँछ, कुन नेताको पकेटबाट के आउँछ, त्यो कुरा मलाई थाहा भएन,' मन्त्री चौधरीले भने, 'अहिले भर्खर पुनरावेदन अदालतको र सर्वोच्च अदालतको विषयमा व्यापक रुपमा कुरा उठिरहेको छ । मन्त्रालय भन्दा ठूलो राष्ट्रिय खेलकुद परिषद्, अधिकार र कर्तव्यमा, त्यो भन्दा पनि ठूलो अहिले खेलकुद संघहरू हुन् । हामीले लगतार एक हप्तादेखि सर्वोच्च अदालतको फैसला पुनरावेदनको फैसला आइसकेपछि ओलम्पिक कमिटीको विषयमा व्यापक रुपमा खेलकुद मन्त्रालय र खेलकुद विभागबाट व्यापक रुपमा छलफल गरेर अघि बढ्यौँ तर सोचेअनुसारको नतिजा ल्याउन सकेनौं । किनभने हामी खेलकुद मन्त्रालय चिठी दिने हो, परिपत्र, निर्देशन दिने हो । हामीले खेलकुद परिषद्मा दिने हो । हामी सर्वोच्च र पुनरावेदनबाट प्राप्त पत्र परिषद्मा पठायौँ ।'
नेपाल ओलम्पिक कमिटीको निर्वाचनमा सहभागी हुने २७ वटा संघलाई कारबाही गर्ने चेतावनी मन्त्री चौधरीले दिएका छन् । कारबाही प्रक्रिया सुरु भइसकेको पनि उनको भनाइ छ । 'हामीले यसमा तपाईंहरू सहभागी नभइदिनुस्, तपाईंहरूको खातासमेत रोक्ने प्रक्रिया हुनसक्छ, धेरै कारबाही हुनसक्छ भनेर हामीले धेरै पत्र पठायौँ । तर उहाँहरूले सुन्नुभएन । त्यो नसुनेपछि हामीले स्पष्टीकरण पठाएका छौँ । सायद केही दिनमा स्पष्टीकरणको जवाफ आउनेछ । केही दिनभित्र खेलकुद संघलाई कारबाही अघि जान्छ,' मन्त्री चौधरीले भने, 'खेलकुद संघलाई कारबाही अघि बढाउने कोसिस गरिरहेको छु । चाहे त्यो जेसुकै अवस्था आओस् । जसले नेपालको नियम नमान्ने, नेपालको कानुन नमान्ने, खेलकुद ऐन नमान्ने व्यक्तिहरू खेलकुद संघमा बस्न उपयुक्त हुँदैन । त्यसकारण म आग्रह गर्न चाहन्छु, त्यस्तो व्यक्तिलाई कांग्रेसको हरेक पाइलामा ठाउँ नदिन आग्रह गर्दछु । तपाईंहरू नै त्यस्तो व्यक्तिलाई ठाउँ दिनुहुन्छ भने नेपाली खेलकुद अघि बढ्न सक्दैन ।’
मन्त्री चौधरीले खेलकुद क्षेत्रको बजेट बढाउन आवश्यक रहेको बताए । नीतिअनुसार स्पष्ट बजेट आउन नसकेको गुनासो उनको थियो । विद्यालय स्तरमा बजेट सबैभन्दा बढी हुनुपर्नेमा त्यसो हुन नसकेको उनको भनाइ छ ।
