पाँचथर — चर्च ब्वाइज क्लब, काठमाडौं फिदिममा जारी फाल्गुनन्द गोल्डकपको फाइनलमा प्रवेश गरेको छ । शुक्रबार सम्पन्न सेमिफाइनलमा आयोजक फिदिम स्पोर्टिङ क्लबलाई ३-१ ले हराउँदै चर्च ब्वाइज फाल्गुनन्द गोल्डकपको फाइनलमा पुगेको हो ।
फिदिम स्पोर्टिङका दिनेश सेर्माले ४३ औं मिनेटमा गोल टिमको खाता खोलेका थिए । लगत्तै ३ मिनेटपछि (इन्जुरी समयमा) चर्च ब्वाइजका समिर तामाङले जवाफी गोल फर्काए ।
मध्यान्तरअघि १-१ बराबरीमा खेले पनि फिदिमका खेलाडी मध्यान्तरपछि पूरै समय दबाबमा रहे । चर्च ब्वाइजका तर्फबाट खेलेका विदेशी खेलाडी अर्मान्ड वेइडमले ६३औं मिनेटमा दोस्रो गोल गर्दै टिमलाई अग्रता दिलाए ।
८५औं मिनेटमा चर्च ब्वाइजबाटै खेलेका अर्का विदेशी खेलाडी फोफोना अवयामीले तेस्रो गोल गरेसँगै आयोजक टिमको फाइनल पुग्ने सपना टुंगिएको हो ।
चर्च ब्वाइजका फोफोना आबायामी म्यान अफ द म्याच घोषित हुँदै नगद १० हजारसहित पुरस्कृत भए । शनिबार न्यु रोड टिम (एनआरटी) र मच्छिन्द्र क्लब काठमाडौंबीच सेमिफाइनल चरणको अन्तिम खेल हुने तालिका छ ।
