काठमाडौँ — योनेक्स सनराइज नेपाल इन्टरनेसनल च्यालेन्जमा मलेसियाले तीन विधामा उपाधि हात पारेको छ ।

मलेसियाले मेन्स डबल्स, वुमन्स डबल्स र मिक्स डबल्सको उपाधि जितेको हो । मेन्स डबल्सतर्फ मलेसियाका लाउ यी सेङ र ली यी बोको जोडीले भारतका च्यानित जोशी र मायंक रानाको जोडीलाई २१–१४, २१–२३, २१–१७ ले पराजित गरेको थियो । वुमन्स डबल्सतर्फ किसोना सेल्भादुरे र याप रु चेनको जोडीले थाइल्यान्डका कोडचापोर्न चाइचाना र पन्नवी पोलियमको जोडीलाई २१–१३, २१–१४ ले हराएर उपाधि जित्यो ।

मिक्स डबल्सको फाइनलमा मलेसियाका लाउ यी सेङ र याप रु चेनको जोडीले थाइल्यान्डका नोन्ताकोर्न थोङ अन र कोड्चापोर्न चाइचानाको जोडीलाई २१–१८, २१–११ ले पराजित गरेको थियो । यस इभेन्टमा नेपालका प्रिन्स दाहाल र रसिला महर्जनको जोडीले कांस्य जितेको थियो । उनीहरू थाइ जोडीसँग सेमिफाइनलमा पराजित भएका थिए ।