काठमाडौँ — एनएनआईपीए स्पोर्ट्स अवार्डको १९ औं संस्करण पुस २० मा हुने भएको छ । यसपल्ट काठमाडौंको तार्केश्वर नगरपालिकास्थित मनमैजु मन्दिर हातामा हुने आयोजक नेपाल राष्ट्रिय तथा अन्तर्राष्ट्रिय खेलाडी संघ (एनएनआईपीए) ले जनाएको छ ।

हरेक वर्ष फरक स्थानमा आयोजना गर्दै आएको अवार्डको यसपालिको संस्करणका लागि एनएनआईपीएले तारकेश्वर नगरपालिकासँग सम्झौता गरेको छ । सोमबार तारकेश्वरका नगरप्रमुख कृष्णहरि महर्जन र एनएनआईपीए अध्यक्ष दीपक श्रेष्ठले सम्झौता पत्रमा हस्ताक्षर गरे । विभिन्न विधामा ३६ जनालाई अवार्ड प्रदान गरिने छ ।

चीनको हाङझाउमा भएको १९ औं एसियाली खेलकुदमा नेपालले सहभागिता जनाएको २९ खेलमा हरेकका खेलाडीलाई वर्ष खेलाडीको रूपमा पुरस्कृत गरिने छ । सम्बन्धित खेल संघको सिफारिसमा सम्मानित हुने खेलाडीले जनही १० हजार पुरस्कार प्राप्त गर्नेछन् ।