काठमाडौँ — दीपेश कँडेलले विजयी चौका प्रहार गरेपछि काठमान्डु गुर्खाजले नेपाल प्रिमियर लिग (एनपीएल) क्रिकेटमा आइतबार विराटनगर किंग्सलाई १ विकेटले पराजित गरेको छ । काठमान्डुले १ सय १८ रनको लक्ष्य १८.१ ओभरमा १ सय २० रन बनाउदै पूरा गरेको हो ।

दीपेश र शंकर रानाको अन्तिम जोडिले १८ रनको अविजित साझेदारी गरे । टिमलाई विजयका लागि २ रनको आवश्यक्ता भएको समयमा दीपेशले सुवास भण्डारीको बलमा विजयी चौका प्रहार गरेका थिए । दीपेशले ५ बलमा अविजित ११ रन बनाउनेक्रममा समान १ चौका र छक्का प्रहार गरे । अर्का अविजित ब्याटर शंकरले २० बल खेली १ चौकासहित १६ रन बनाए ।

काठमान्डुको यस विजयले प्लेअफमा पुग्ने सम्भावना झिनो मात्र बाँकी छ । काठमान्डुले ७ खेलमा चौथो विजय हात पारेको हो । काठमान्डुले ठूलो अन्तरले विजय हात पार्न नसकेपछि चितवन राइनोज प्लेअफमा पुगेको छ । काठमान्डु, चितवन र कर्णाली याक्सकको समान ८ अंक भए पनि चितवन नेट रन रेटमा अगाडि छ । कर्णालीले सोमबार सुदूरपश्चिमसँग राउन्ड रोबिन लिगमा आफ्नो अन्तिम खेल्ने छ ।

प्रतीक श्रेष्ठले सर्वाधिक ३९ रन बनाए । उनले ३४ बल खेली समान २ चौका र २ छक्का प्रहार गरे । स्टेफन इस्किनाजी १, माइकल लेभिट १०, जेहरार्ड इरसमस १२, भीम सार्की १, ड्यान डाउथवेट १, रशिद खान १४, कप्तान करण केसी शून्यमा आउट भएका थिए । सन्दीपले ४ ओभरमा १९ रनमात्र खर्चे । क्रिस सोलले ४ ओभरमा २१ र बसिर अहमदले ४ ओभरमा २७ रन खर्चेर २–२ विकेट लिए ।

यसअघि टस हारेर ब्याटिङको निम्तो पाएको विराटनगर १९.५ ओभरमा १ सय १७ रनमा अलआउट भएको थियो । इरसमसले उत्कृष्ट बलिङ गर्दै विराटनगरलाई सानो स्कोरमा रोक्न महत्त्वपूर्ण भूमिका खेले । अफ स्पिनर इरसमसले ४ ओभरमा १७ रन खर्चेर ३ विकेट लिए । स्कट इडवार्डसलाई बोल्ड गरेका उनले एकै ओभरमा क्रिस सोल र कप्तान सन्दीप लामिछानेको विकेट पनि लिए ।