पाल्पा — पाल्पाका पालिकास्तरीय डाउनटाउन नकआउट क्रिकेट प्रतियोगिताको उपाधि शनिबार तानसेन नगरपालिकाको तानसेन क्रिकेट क्लबले जितेको छ । 

फाइनलमा रैनादेवी छहरालाई ४९ रनले पछि पार्दै तानसेनले पालिकास्तरीय क्रिकेटको उपाधि हासिल गरेको हो । तानसेन टुँडिखेलमा टस जितेर पहिला रैनादेवी छहरा गाउँपालिकाले फिल्डिङ रोजेपछि ब्याटिङमा उत्रेको तानसेनले निर्धारित २० ओभरको खेलमा ८ विकेट गुमाएर १ सय ३९ रन जोडेको थियो । तानसेनका लागि विशाल दर्नालले ४०,  रुपेश बस्यालले ३५, श्रीधर बस्यालले १५ र तेजेन्द्र बीरजंग राणलो १२ रन जोडेका थिए । वलिङतर्फ रैनादेवी छहराका मदन नेपालीले ४, अमीत तिवारीले २ विकेट लिए । 

१ सय ४० रनको लक्ष्य लिएर मैदान उत्रेको रैनादेवी छहरा निर्धारित ओभरमा ८ विकेट गुमाएर ९० रनमै समेटियो । रैनादेवीका लागि लक्ष्मण सार्कीले अविजित २९, मिलन केसीले १६, भक्त कार्कीले अविजित ४ रन जोडे । बलिङतर्फ तानसेनका श्रीधर बस्यालले ३, सागर सिलवाल र शुभम् भुसालले समान २/२ विकेट लिए । विजयी तानसेनलाई ५० हजार र उपविजयी रैनादेवी छहरालाई २५ हजार नगद पुरस्कार, मेडल, प्रमाणपत्र र ट्रफी वितरण गरिएको लियो क्लब अफ पाल्पा दोस्रोका अध्यक्ष विक्रम घिमिरेले जानकारी दिए ।