‘साथीहरू, दाइभाइहरूसँग जाँदा रमाइलो हुन्छ । उहाँ पुगेपछि पनि समूहमा बसिन्छ । टिमका पक्षमा माहोल बन्छ,’ आश्विनले भने । पाँचवटा बस पूरै भरिन खासै समय लागेन । बसमा जान टिकट भएकाहरूले अघिल्लो दिनै नाम टिपाएका थिए । को–को कुन बसमा चढ्ने, ढोकामा नाम टाँसिएको थियो । यात्रा निःशुल्क त थियो नै । खाजापानीको व्यवस्था पनि पाइन्थ्यो ।

‘पाँच बस सधैं भरिएको छ । हामीले चितवनको म्याच हुँदाका दिनमात्रै बस पठाउने गरेका छौं । पछिल्ला दिनहरूमा त पाँच बसमा मान्छे नअटाउने भइसके । नअटाएकाहरू आ–आफ्नै हिसाबले खुसीका साथ गइरहेका देखेका छौं,’ व्यवस्थापनमा खटिएका सीएमसीका हरि बोहराले भने । दिउँसो खेल हुँदा बिहान ६ बजे र बिहान पहिलो खेल पर्दा अझ सबेरै ३ बजे नै बस छुट्छ ।

‘हामीले जुन बस व्यवस्था गरेका छौं, त्यसमा भन्दा पनि धेरै समर्थक आ–आफ्नै ढंगले मैदान आइपुगेका छन् । चितवनका मान्छेहरू पनि काठमाडौंमा प्रशस्तै हुनुहुन्छ । सबै टिमको हौसला बढाउन मैदानसम्म आइपुग्नु हाम्रा लागि गर्वको कुरा हो,’ चितवन राइनोजका निर्देशक प्रताप देवकोटाले भने । चितवन हालसम्म ६ खेल खेल्दा ३ मा जित र ३ मा पराजित छ । शनिबार बिहान चितवनले जनकपुरसँग खेल्दै छ । चितवनले आफ्नो सुरुआती खेलमा गुर्खाजलाई हराएर एनपीएल यात्राको सुखद सुरआत गरेको थियो ।