लुम्बिनी — रूपन्देहीको गैडहवा गाउँपालिका १ का अजयकुमार चौहान जिल्लाबाट उदाएका प्रतिभावान क्रिकेटर हुन् । उनले सिनियर टिमबाट राष्ट्रिय प्रतियोगितासँगै यू–१९ र यू–१६ टोलीबाट धेरैपटक खेलिसकेका छन् ।

जिल्लालाई प्रतिनिधित्व गरिरहेका अजयलाई रूपन्देही जिल्ला क्रिकेट संघले मासिक तलब सुविधा दिन थालेको छ । उनले मासिक ५ हजार रुपैयाँ पाउँछन् । अजयजस्तै जिल्लामा सक्रिय रहेका क्रिकेट खेलाडीहरूलाई रूपन्देही क्रिकेट संघले मासिक तलब उपलब्ध गराउने थालेको छ । संघले चालु आव ७ खेलाडीलाई तलब दिनेछ ।

क्रिकेटर अजय रकम धेरै, थोरैभन्दा पनि खेलाडीलाई जिल्लामा यसरी प्रोत्साहन गर्ने कार्य सकारात्मक रहेको ठान्छन् । उनले भने, ‘कम्तीमा यो पैसाले क्रिकेट खेल्नकै लागि आवश्यक डाइट किन्न सकिन्छ । घरमा बुवाआमासँग पैसा मागिरहने झन्झट हट्छ । मलाई त व्यक्तिगत रूपमा अत्यन्तै खुसी लागेको छ ।’ 

जिल्लाबाटै खेल्दै १२ वर्षकै उमेरमा प्रदेशबाट यू–१९ टिममा परेकी एन्जिला पाठक पनि तलब पाउने भएपछि खुसी छिन् । ‘म त भर्खरै क्रिकेटमा प्रवेश गर्दै छु,’ उनले खुसी व्यक्त गर्दै भनिन्, ‘अहिलेबाट नै आर्थिक रूपमा सहयोग पाउने भएपछि खेल्नमा थप रुचि बढेको छ । जिल्लाकै खेलाडीले पनि तलब पाउँछ भन्दा गर्व महसुस भएको छ ।’ 

रूपन्देही जिल्ला क्रिकेट संघले गत वर्ष खेलाडी कल्याणकारी कोष स्थापना गरेको थियो । सोही कोषमार्फत आव २०८१/०८२ का लागि मासिक ५ हजार रुपैयाँ उपलब्ध गराउने गरी ७ खेलाडी छनोट गरिएको संघका अध्यक्ष हरिबहादुर थापाले जानकारी दिए । 

उनले भने, ‘हामीले गत वर्ष ९ खेलाडीलाई रकम उपलब्ध गराएका थियौं,’ उनले भने, ‘यस वर्ष आर्थिक मन्दीका कारण दुईजना घटाउनुपर्‍यो । तर, हामी जतिसक्दो खेलाडीलाई दिन पाए हुन्थ्यो भन्नेतर्फ अघि बढेका छौं ।’