धनगढी — खेलकुद अवार्ड २०८१ तथा सुदूरपश्चिम प्रदेश कराते रेफ्री सेमिनारका क्रममा करातेकी ऐतिहासिक पदक विजेता खेलाडी एरिका गुरुङलाई २ लाखसहित सम्मान गरिएको छ ।

उक्त रकम हाल अमेरिकामा रहेका करातेका पूर्वअन्तर्राष्ट्रिय खेलाडी जनकसिंह खड्काले उपलब्ध गराएका थिए । १९औं एसियाली खेलकुदमा कराते खेलतर्फ स्वर्ण, रजत र कांस्य जित्ने नेपाली खेलाडीलाई क्रमशः ३ लाख, २ लाख र १ लाख नगद पुरस्कार दिने पूर्वघोषणा गरेअनुरुप खड्काले रकम उपलब्ध गराएका हुन् ।

कार्यक्रमअघि एरिका र भुटानमा हालै सम्पन्न आठौं दक्षिण एसियाली कराते प्रतियोगिताका पदक विजेता खेलाडीको सम्मानमा सहिद गेटदेखि धनगढी रंगशालासम्म र्‍याली निकालिएको थियो । त्यसमा नेपाल प्रहरीको ब्याण्डसहित बिभिन्न खेलका खेलाडी, प्रशिक्षक, रेफ्री, खेलसंघका पदाधिकारी, जिल्ला र प्रदेश खेलकुदका कर्मचारी तथा खेलप्रेमी सहभागी थिए ।

आठौं दक्षिण एसियाली कराते प्रतियोगिताका पदक बिजेता सुदूरपश्चिम प्रदेशका खेलाडीलाई पनि एक लाख रुपैयाँ पुरस्कारसहित सम्मानित गरिएको थियो ।उक्त पुरस्कार राशि प्रदेशका मुख्यमन्त्री कमलबहादुर शाहले उपलब्ध गराएका थिए ।

सोही अवसरमा सुदूरपश्चिम प्रदेश कराते महासंघले निरन्तर प्रशिक्षणरत रही राष्ट्रिय एवं अन्तर्राष्ट्रिय खेलाडी उत्पादन गरेका उत्कृष्ट प्रशिक्षकद्वय वीरेन्द्रबहादुर चन्द र ललित खत्री तथा प्रदेशकै प्रथम एसियाली रेफ्री प्रकाशकुमार चन्दलाई नगदसहित सम्मानित गरेको थियो । करातेका पूर्व खेलाडी तथा प्रदेशका उद्योग, पर्यटन, वातावरण तथा वनमन्त्री लक्ष्मणकिशोर चौधरीलाई मानार्थ ब्ल्याकबेल्ट तेस्रो डान प्रदान गरिएको थियो । नेपाल कराते महासंघका संस्थापक अध्यक्ष एवं नेपाल सितोरियो कराते संघका अध्यक्ष दावा गुरुङले चौधरीलाई प्रमाणपत्र, कराते ड्रेस र बेल्ट प्रदान गरे ।