काठमाडौँ — कर्णाली प्रदेशका मुख्यमन्त्री यामलाल कँडेलले दशौं राष्ट्रिय खेलकुद प्रतियोगिता कर्णालीप्रतिको भरोसा र विश्वास भएको बताएका छन् ।

शनिबार वीरेन्द्रनगरमा आयोजित प्रतियोगिताको तयारीसम्बन्धी सरोकारवालासँगको छलफल तथा परामर्श कार्यक्रममा मुख्यमन्त्री कँडेलले प्रतियोगिता आयोजना हुने कुराको देश तथा विदेशबाट मूल्यांकन हुने बताए।

उनले अहिले नै खेलकुद प्रतियोगिताको लागि दिनगन्ती सुरु भइसकेको भन्दै व्यवस्थापन कमजोर हुन नदिन सबैसँग आग्रह गरे । निर्धारित समय अनुसार आगामी मंसिर २ देखि ९ गतेसम्म प्रतियोगिता आयोजना हुँदैछ। त्यसबेलासम्म अहिलेको अवस्था अनुसार व्यवस्थापन कमजोर रहेको मुख्यमन्त्री कँडेलको भनाइ थियो । 

प्राप्त बजेटबाट दक्षता देखाउन खेलकुद परिषद्लाई निर्देशन दिँदै ठाउँ-ठाउँ पुगेर विभिन्न माग नराख्न ध्यानाकर्षण गराए। गर्नुपर्ने कामहरू सरकारका तर्फबाट सरकारका प्रतिनिधिले गरिरहेको जानकारी गराए। कमजोर आन्तरिक आम्दानी भएको अवस्थालाई व्यक्त गर्दै मुख्यमन्त्री कँडेलले खेलाडीलाई परिस्थिति बुझाउन अधिकतम प्रयास गरी निराश हुन नदिने प्रतिबद्धता जनाए।