मकवानपुर — नेपाली खेलकुदको सबैभन्दा ठूलो परियोजनाको रूपमा रहेको गौरीटार रंगशाला निर्माणको कामले तीव्रता पाएको छ । वाग्मती प्रदेशका युवा तथा खेलकुदमन्त्री मीनकृष्ण महर्जनले रंगशालाको स्थलगत निरीक्षण गर्दै सम्पूर्ण पूर्वाधार निर्माण तोकिएको समयमा पूरा गर्न निर्देशन दिएका छन् ।

हेटौंडा–६ स्थित गौरीटारमा क्रिकेट, फुटबल मैदान र पौडीपोखरीको निर्माण भइरहेको छ । मन्त्री महर्जनले गत वैशाखमा शिलान्यास गरिएको क्रिकेट मैदान र पौडीपोखरीको कामले तीव्रता पाएकोमा खुसी व्यक्त गरेका छन् ।

प्रदेश सरकारले गत आर्थिक वर्षदेखि क्रिकेट रंगशाला निर्माणका लागि १२ करोड र पौडीपोखरी निर्माणका लागि ९ करोड रुपैयाँ बजेट विनियोजन गरेर निर्माण थालेको हो । उनका अनुसार उक्त क्रिकेट मैदानमा पहिलो चरणमा ६ सय दर्शक क्षमताको एउटा प्यारापिटसहित ५ वटा पिच, ७० मिटर रेडियसको ग्राउन्ड भीभीआईपी कक्ष, खेलाडी कक्ष, चेन्जिङ रुम, टीभी र रेडियो ब्रोडकास्टिङ कक्ष, मिडिया कक्ष, अपांगमैत्री क्षेत्र, पार्किङलगायत संरचना निर्माण हुने राखेपका इन्जिनियर निवेश बर्तौलाले बताए ।

आगामी एक वर्षभित्र उक्त संरचना निर्माण सम्पन्न गर्नुपर्ने गरी ठेक्कामार्फत् काम भइरहेको प्रदेश खेलकुद विकास परिषद्का इञ्जिनियर बर्तौलाले बताए । निरीक्षणपछि मन्त्री महर्जनले समयसीमाभित्रै निर्माण कार्य सम्पन्न गर्ने पहल र निर्माण कम्पनीलाई दबाब दिने बताए । 

खेलकुदमा निर्माण कार्य अत्यन्त सुस्त हुने गरेकाले प्रदेश सरकारले तत्काल निर्माण कम्पनीलाई उपस्थित गराएर काम छिटो सक्न निर्देशन गर्ने उनको भनाइ छ । प्रदेश सरकारले खलकुद क्षेत्रको विकासका लागि स्तरीय खेलकुद संरचनासँगै खेलाडी प्रोत्साहनमा समेत काम गर्ने लक्ष्य लिएको उनले बताए ।

उनले रंगशाला भित्र निर्माण भइरहेका दुइटै खेलकुद संरचनाको निर्माणको जिम्मा लिएका कम्पनीका प्रतिनिधिलाई उपस्थित गराउने निर्देशनसमेत दिएका छन् । राज्यका निकायका कमजोरी, मन्त्रीहरूको खबरदारी नहुँदा खेलकुदका संरचना अलपत्र पर्ने गरेकाले त्यसलाई रोक्न सुझाए ।

गौरीटार रंगशालामा विभिन्न १९ खेलसम्बन्धित संरचना निर्माण गरिने योजनाअनुसार काम सुरु गरिएको हो । देश संघीय संरचनामा गएसँगै रंगशाला निर्माणको काम प्रदेश सरकारअन्तर्गत रहेको उक्त आयोजनामा क्रमागतबाट बजेट विनियोजन गरिदै आएको छ । फुटबल मैदान, एथलेटिक्स ट्र्याक एन्ड फिल्ड, भीआईपी प्यारापिट र फ्लडलाइट गरी ९० करोड रुपैयाँको लागत अनुमानसहित डीपीआर तयार पारेर काम गरिरहेको छ ।

निरीक्षणका क्रममा मन्त्रालयका सचिव रुद्रप्रसाद लामिछाने र प्रदेश खेलकुद परिषद्का इन्जिनियर निवेश बर्तौलाले ब्रिफिङ गरेका थिए । केन्द्रीय खेलकुद प्रतिष्ठान (गौरीटार रंगशाला) का रूपमा विकास गर्नेगरी तत्कालीन समयमा राष्ट्रिय खेलकुद परिषद्ले खेलकुद संचना निर्माणको थालनी गरेको थियो ।