काठमाडौँ — कांग्रेसका महामन्त्री प्रदीप पौडेलले पार्टीको नयाँ विधानमार्फत ३५ वर्षमुनिका २१ जनालाई केन्द्रीय कार्यसमितिमा अनिवार्य रूपमा प्रतिनिधित्व गराउने व्यवस्था गरिएको बताएका छन् ।

४४औँ बीपी स्मृति दिवसका अवसरमा बिहीबार आयोजित कार्यक्रममा उनले कांग्रेसलाई युवामुखी, लोकतान्त्रिक र प्रविधिमैत्री संगठनका रूपमा रूपान्तरण गर्ने उद्देश्यले यस्तो व्यवस्था गरिएको बताएका हुन् ।

पौडेलका अनुसार केन्द्रीय कार्यसमिति मात्र होइन, क्षेत्रीय प्रतिनिधिसहित पार्टीका विभिन्न संरचनामा पनि ३५ र ३० वर्षमुनिका युवाको सहभागिता सुनिश्चित गर्ने प्रावधान राखिएको छ।

उनले कांग्रेसको सदस्यता प्रणाली पूर्ण रूपमा डिजिटल बनाइएको जानकारी दिँदै अब हरेक क्रियाशील सदस्यसँग डिजिटल आईडी हुने बताए। सदस्यता थप्न, सच्याउन र अद्यावधिक गर्न सकिने व्यवस्था गरिएको भन्दै उनले १४औँ महाधिवेशनका बेला जति सदस्य थिए, अहिले पनि करिब त्यत्तिकै सदस्यता कायम हुने अवस्था बनेको बताए।