राप्रपा संसदीय दलका नेता ज्ञानबहादुर शाहीले भने- 'हिजो सिंहदरबार भन्दा मान्छे ठूलो भन्नेहरू आज मान्छेभन्दा नियम ठूलो भन्दैछन् ।'
काठमाडौँ — राष्ट्रिय प्रजातन्त्र पार्टीका संसदीय दलका नेता ज्ञानबहादुर शाहीले सरकारमा रहेका व्यक्तिहरूले नै संचार माध्यम र प्रतिपक्षी दलको नेताको घर अगाडि अवैधानिक पार्किङ गराउनका लागि कार्यकर्ता खटाएको बताएका छन् ।
प्रतिनिधिसभाको मंगलबारको बैठकमा नेता शाहीले सरकारमा रहेका जिम्मेवार व्यक्तिहरूले जनताका मुद्दामा राजनीतिकरण गरेको बताएका हुन् । 'आफैं सरकारमा बस्ने, आफै आफ्ना कार्यकर्ता लगाएर न्यूरोड, संचार माध्यमका कार्यालय र प्रतिपक्षका घर अगाडि अवैधानिक पार्किङ गराउने, त्यसको भिडियो बनाएर सर्वसाधारणले गरेको भन्दै अल्गोरिदम फैलाएर मिडियाबाजी गर्ने गतिविधिलाई राजनीतिकरण भनिन्छ,' शाहीले भने, 'घरको अगाडि पार्किङ गराएर जसरी राज्य आतंक सिर्जना गरिएको छ त्यो कालान्तर इतिहासमा कालो अक्षरले लेखिनेछ ।' सोमबार कान्तिपुर, अनलाइन खबरका कार्यालय र प्रमुख प्रतिपक्षी कांग्रेसका सभापति गगन थापाको घर अगाडि काम अवरोध गर्ने गरी अवरोध सिर्जना गरिएको थियो ।
कसैले पनि जथाभावी पार्किङ गर्नुपर्ने कुराको पक्ष नलिएको पनि उनले स्पष्ट पारे । 'हामीले कहिल्यै पनि सडक पार्किङ गर्नुपर्छ भनेका छैनौं । यस्ता भ्रामक अल्गोरिदम फैलाएर मान्छेका चरित्र हत्या गर्ने काम तत्काल बन्द गरियोस्,' उनले भने ।
सर्वसाधारणलाई ट्राफिक नियम पालना नगरेको भनेर प्रहरीले कारबाही गरेको तर सत्तामा रहेका व्यक्तिहरूलाई भने कुनै कारबाही नभएको पनि शाहीको भनाइ थियो । 'ट्राफिक नियम उलंघन गर्दा सर्वसाधारणलाई कारबाही हुन्छ भने सिटबेल्ट नलगाई गाडी चलाउने गृहमन्त्री र प्रधानमन्त्रीलाई कारबाही किन हुँदैन ? न्याय सबैका लागि बराबर हुनुपर्छ । मान्छेको जीवनभन्दा ठूलो तिम्रो लोकप्रतियता होइन,' उनले भने ।
त्यस्तै, विगतमा सिंहदरबारभन्दा मान्छे ठूलो भन्नेहरूले बोली फेरेको पनि शाहिले बताए । 'हिजो सिंहदरबार भन्दा मान्छे ठूलो भन्नेहरू आज मान्छेभन्दा नियम ठूलो भन्दैछन्,' उनले भने ।
