एमाले सांसद पुष्पराज कँडेलले भने- 'मन्त्रीहरूले सचिवालयमा ९ जनासम्म सल्लाहकार र निजी सचिव राख्न पाउने गरी तयारी भइरहेको सुनिएको छ, यदि यो सत्य हो भने यो नीतिगत भ्रष्टाचारको पराकाष्ठा हो ।'
काठमाडौँ — एमाले सांसद पुष्पराज कँडेलले प्रधानमन्त्रीको विवादास्पद अभिव्यक्ति र पार्टी उपाध्यक्ष विष्णु पौडेलको गिरफ्तारीलाई लिएर सरकारको आलोचना गरेका छन् ।
गत जेठ १७ गते संसदमा प्रश्नोत्तरका क्रममा प्रधानमन्त्री वालेन्द्र शाहले दिभएको सीमासम्बन्धी अभिव्यक्तिप्रति आपत्ति प्रकट गरे । प्रधानमन्त्रीले नेपालले पनि भारतको भूमि धेरै ठाउँमा मिचेको छ भनी दिएको अभिव्यक्ति राष्ट्रघाती भएको कँडेलको दाबी छ । उक्त अभिव्यक्तिले भविष्यमा दुई देशबीच हुने वार्तामा नेपालको विपक्षमा प्रमाणको रूपमा काम गर्न सक्ने खतरा औंल्याउँदै प्रधानमन्त्रीले माफी माग्नुपर्ने र उक्त भनाइ संसदको अभिलेखबाट हटाउनुपर्ने माग गरे ।
‘देशको प्रधानमन्त्रीले सम्बन्धित पक्षले समेत नउठाएको र कतै चर्चा नभएको विषयमा नेपालले भारतको भूमि मिचेको भनी संसदमा बोल्नु गम्भीर षडयन्त्रको संकेत हो । विष्णु पौडेल बेकसुर हुनुहुन्छ । सरकारले आफ्ना कमजोरी लुकाउन र अन्तर्राष्ट्रिय निकाय (एफएटीएफ) लाई देखाउनका लागि मात्र उच्च ओहदाका व्यक्ति पक्राउ गरेको नाटक गरिरहेको छ। यो नेकपा एमालेलाई बदनाम गर्ने कुत्सित मनसायले प्रेरित छ,’ उनले भने ।
एमाले उपाध्यक्ष एवं पूर्व उपप्रधान तथा अर्थमन्त्री विष्णु पौडेललाई सम्पत्ति शुद्धीकरण अभियोगमा पक्राउ गरिएको विषयमा पनि सांसद कँडेलले कडा विरोध जनाए । उनले यस गिरफ्तारीलाई राजनीतिक प्रतिशोध र विपक्षीलाई तर्साउने रणनीतिको रूपमा व्याख्या गरे । पौडेलको तत्काल रिहाइको माग समेत कँडेलले गरे ।
सांसद कँडेलले मन्त्रीहरूले सचिवालयमा ९ जनासम्म सल्लाहकार र निजी सचिव राख्न पाउने गरी तयारी भइरहेको भन्ने समाचारप्रति पनि प्रश्न उठाएका छन् । 'यदि यो सत्य हो भने यो नीतिगत भ्रष्टाचार को पराकाष्ठा हो,' उनले भने, 'सरकारले एकातिर वास्तविक अपराधीलाई उन्मुक्ति दिने र अर्कोतिर करका दरमा सूचना चुहावट गरी बिचौलियालाई लाभ पुर्याउने काम गरिरहेको छ । प्रधानमन्त्री कार्यालय मातहत रहेका छानबिन निकायहरूलाई राजनीतिक हतियार नबनाउन समेत उनले चेतावनी दिए ।
