७८९ मत ल्याउँदै उपसभापतिमा विजयी भएकी सोविता गौतमले प्रतिस्पर्धा सकिएपछि सबै एउटै परिवार भएर पार्टीलाई अघि बढाउने बताएकी छन्।
भरतपुर — राष्ट्रिय स्वतन्त्र पार्टी (रास्वपा) को उपसभापतिमा निर्वाचित सोविता गौतमले प्रतिस्पर्धा नतिजासम्म मात्र सीमित रहने भन्दै भोलिदेखि सबै एउटै परिवारका रूपमा अघि बढ्ने बताएकी छन् ।
निकटम प्रतिद्वन्द्वी डा. तोशिमा कार्कीको प्रशंसा गर्दै उनले भनिन्, ‘निर्वाचन लोकतान्त्रिक प्रक्रिया भएकाले स्वस्थ प्रतिस्पर्धा गर्यौं ।’ डा. कार्कीले पनि आफूहरू परिवार भएको बताइन् ।
कान्तिपुरसँग कुरा गर्दै उपसभापति गौतमले कार्कीलाई सक्षम नेतृका रूपमा सम्बोधन गर्दै भोलिदेखि पार्टीको नियमित काममा सँगै जोडिने बताइन् । अर्को प्रसंगमा उनले पार्टीलाई सरकारभन्दा माथि हुने भन्दै पार्टी नै मूल स्रोत भएको र मन्त्री वा अन्य पद पार्टीले जिम्मेवारी दिएपछि मात्र हुने बताइन् । ‘पार्टीको सिद्धान्त र नीतिले नै सरकार सञ्चालनलाई निर्देशित गर्ने भएकाले पहिलो प्राथमिकता पार्टी निर्माणमा हुनेछ,’ उनले भनिन् ।
सरकारलाई गतिमा राख्दै जनतालाई छिटो न्याय र समृद्धिको परिणाम दिन तत्पर रहने प्रतिबद्धता पनि उनले व्यक्त गरिन् । पहिलो पटक पार्टीमा नयाँ टिम आएको उल्लेख गर्दै गौतमले यो टिमले पार्टीलाई कसरी अघि लैजाने भन्ने तय गर्ने बताइन् ।
शुक्रबार विद्युतीय भोटिङ मेसिन र प्रवासका प्रतिनिधिले अनलाइनमार्फत गरेको मतदानबाट गौतम ७८९ मत ल्याएर उपसभापतिमा निर्वाचित हुँदा उनकी प्रतिस्पर्धी तोसिमा कार्कीले ५७२ मत ल्याएकी थिइन् ।
