रास्वपाका एक नेताले कान्तिपुरलाई उपलब्ध गराएको सूचीमा, ५६ जनाको नाम छ, तीमध्ये कतिपय वालेन्द्र शाह पक्षबाट समायोजन भएर रास्वपामा गएकाहरु पनि छन् ।
What you should know
भरतपुर (चितवन) — कुनै समूहगत उम्मेदवारी नहुने भनिएको राष्ट्रिय स्वतन्त्र पार्टी (रास्वपा) मा प्रतिनिधिहरुलाई अज्ञात नम्बरहरुबाट मतदान गर्नुपर्नेको सूची जान थालेपछि असन्तुष्टि देखिन थालेको छ ।
रास्वपाका एक नेताले कान्तिपुरलाई उपलब्ध गराएको सूचीमा, ५६ जनाको नाम छ, तीमध्ये कतिपय वालेन्द्र शाह पक्षबाट समायोजन भएर रास्वपामा गएकाहरु पनि छन् । रास्वपाको ९९ केन्द्रीय सदस्य चयनका लागि गएराति १२ बजेबाट विद्युतीय भोटिङ मेसिनमार्फत् मतदान सुरु भएको छ । मतदान सुरु भएको केही घन्टा पछाडि त्यस्तो सूची ह्वाट्स एपमा आएको पाएको ती नेताले बताएका छन् ।
रास्वपाका अर्का एक जना सांसद्ले विगतमा एमाले, कांग्रेस त्यही गुटगत राजनीतिका कारण विग्रिएको निष्कर्षसहित सामूहिक उम्मेदवारी नदिने भनिए पनि रास्वपामा झन् खराब अभ्यास देखिएको टिप्पणी गरे । ‘यसमा कुन तहको संलग्नता हो, पार्टीले छानबिन गर्नुपर्छ,’ उनले कान्तिपुरसँग भने, ‘कसैलाई बदनाम गराउन समेत यसो गरिएको हुनसक्ने सम्भवना रहेकाले समेत यो विषयलाई यत्तिकै छाड्नु हुँदैन ।’
विद्युतीय मतदान गर्ने मेसिनको क्रमसंख्यामा समेत उम्मेदवारहरुले असन्तुष्टि जनाइरहेका छन् । रास्वपा केन्द्रीय सदस्यका उम्मेदवार गणेश कार्कीले प्रारम्भिक सूचीमा आफूभन्दा तल दर्ता भएकाहरुको नाम कसरी अगाडि आयो भनेर प्रश्न गरेका छन् । ‘मेरो नाम खुलातर्फको १३३ नम्बरमा रहेछ, के आधारमा भोटिङ मेसिनमा नाम स्थान तोकियो,’ उनले प्रश्न गरेका छन् ।
सांसद् यज्ञमणि न्यौपानेले पनि आफूभन्दा पछाडि फर्म भरेकाहरुको नाम अगाडि आएको देखिएको बताएका छन् । 'मेरो नाम खुल्ला सूचीको ४२ नम्बरमा रहेछ, अल्फाबेटिकल अर्डरसमेत मिलाएको होइन रहेछ,' उनले सामाजिक सञ्जालमा लेखेका छन् ।
रास्वपा निर्वाचन आयोग प्रमुख भुवन केसीले भने उम्मेदवारमध्ये जसले जति नम्बरमा दर्ता गरेको हो, त्यही अनुसार क्रमसंख्या मिलाएर तथ्यांक इन्ट्री गराइएको दाबी गरेका छन् । उनले कान्तिपुरसँग भने, ‘हामीले अरु तलमाथि गरेको छैन ।’
सांसद् आशिका तामाङले मतदान गरेपछि कान्तिपुरसँग कुरा गर्दै आफूले चाहेर पनि नेतालाई चुन्नलाई गाह्रो हुने प्रणाली रहेको बताइन् । ‘मन लागोस् कि नलागोस् ६४ जनालाई नलाही अर्कोमा जानै पाइँदैन,’ उनले भनिन्, ‘मेरो आफ्नै नाम खोज्नलाई ५ मिनेट लाग्यो ।’ मतदान गर्ने मसिनमा तस्वीरसमेत राखिएको छैन । रास्वपा नेता हरि ढकाल चाहिँ तस्वीर राख्नतिर लागिएको भए थप समय लाग्ने भएकाले नराखिएको बताएका छन् ।
वालेन्द्र पक्षका एक नेताले चाहिँ बदनाम गराउनलाई त्यसो गरिएको हुनसक्ने दाबी गरे । ‘त्यो विषयमा खोजी होला,’ उनले भने । रास्वपामा केन्द्रीय सदस्यको निर्वाचनका लागि बिहीबार दिउँसो १२ बजेसम्म मतदान गर्ने समय तोकिएको छ । निर्वाचित केन्द्रीय सदस्यहरुमध्येबाट पदाधिकारी चुन्ने व्यवस्था छ ।
सर्वसम्मत रुपमा नेतृत्व चयन नभए छुट्टै मतदान हुनेछ । पार्टी सभापतिमा चाहिँ सर्वसम्मत रुपमा रवि लामिछाने निर्वाचित भइसकेका छन् ।
