काठमाडौँ — राष्ट्रिय स्वतन्त्र पार्टीको केन्द्रीय सदस्यको मतदान बुधबार राति साढे १० बजेदेखि सुरु हुने भएको छ । रास्वपा निर्वाचन आयोगका प्रमुख भुवन केसीले बुधबार राति १० बजे एक सूचना जारी गर्दै केन्द्रीय सदस्यका लागि मतदान राति साढे १० बजेबाट सुरु हुने जानकारी दिएका छन् ।

मतदानको अवधि बिहीबार बिहान १० बजेसम्म जारी रहने समय निर्धारण गरिएको छ । 'निर्वाचन आयोगले तोकिएको समयमा व्यवस्थित, पारदर्शी र निष्पक्ष रूपमा मतदान सम्पन्न गराउन आवश्यक सम्पूर्ण तयारी पूरा गर्नेछ । सम्बन्धित सबै प्रतिनिधिहरूलाई तोकिएको समयभित्र आफ्नो मतदान अधिकार प्रयोग गरिदिन हुन हार्दिक अनुरोध गर्दछौं,' निर्वाचन आयोग प्रमुख केसीले जारी गरेको सूचनामा लेखिएको छ, 'मतदानस्थल, डिजिटल मतपत्र र निर्वाचन प्रक्रियाका अन्य व्यवस्थाबारे प्रतिनिधिहरूलाई छुट्टै जानकारी गराइनेछ । निर्वाचनलाई सफल बनाउन सबैबाट सहयोगको अपेक्षा छ ।'