पार्टीभित्र बृहत्तर एकता, संगठन विस्तार र नेतृत्वको भूमिकाबारे बहस चलिरहेका बेला संस्थापनइतर समूहको विराटनगर भेलालाई अर्थपूर्ण रूपमा हेरिएको छ ।
विराटनगर — कांग्रेसको इतर समूहको कोशी प्रदेशस्तरीय भेला आइतबार विराटनगरमा सुरू भएको छ । पार्टीभित्र बृहत्तर एकता, संगठन सुदृढीकरण र आगामी राजनीतिक रणनीतिबारे छलफल गर्ने उद्देश्यसहित भेला आयोजना गरिएको जनाइएको छ ।
विराटनगरस्थित होटल मनास्लुमा आयोजित भेलामा कांग्रेस नेता शेखर कोइराला, पूर्वमहामन्त्रीद्वय कृष्ण सिटौला र शशांक कोइराला, मीन विश्वकर्मा, मीनेन्द्र रिजाल, सुशीला ढकाल, महिन्द्रा सुब्बालगायतका नेता तथा कार्यकर्ता भेलामा सहभागी छन् ।
भेलाअघि नेता शेखर कोइराला र कांग्रेसका पूर्वमहामन्त्री शशांक कोइराला विराटनगरस्थित कोइराला निवासमा सँगै देखिएका थिए । मञ्चमा पनि यी दुई नेता सँगै देखिए ।
पछिल्लो समय कांग्रेसभित्र आन्तरिक एकता र नेतृत्वको भूमिकाबारे विभिन्न बहस चलिरहेका बेला दुई नेताको संयुक्त उपस्थितिलाई राजनीतिक रूपमा अर्थपूर्ण रूपमा हेरिएको छ ।
गत पुसमा सम्पन्न विशेष महाधिवेशन प्रक्रियाप्रति असन्तुष्टि जनाउँदै त्यसमा सहभागी नभएको इतर पक्षले प्रदेशस्तरमा पहिलोपटक यस्तो भेला आयोजना गरेको हो । भेलामा पार्टीभित्रको एकता, संगठन विस्तार, आगामी महाधिवेशनको तयारी तथा समसामयिक राजनीतिक विषयमा छलफल हुने बताइएको छ ।
