दुवै नेताले भेटमा राजनीतिमा जेन-जीको बढ्दो भूमिका, उनीहरूको लोकतान्त्रिक सहभागिता र भविष्यको नेतृत्वबारे पनि कुराकानी गरेका छन् ।
काठमाडौँ — रास्वपा सभापति रवि लामिछाने नेतृत्वको प्रतिनिधिमण्डलले नयाँदिल्लीमा भारतीय सत्तारुढ दल भाजपाका शीर्ष नेतृत्वसँग भेटवार्ता गरेको छ । मंगलबार भाजपा मुख्यालयमा लामिछानेले भाजपाका राष्ट्रिय अध्यक्ष नितिन नवीनलगायतका शीर्ष नेताहरूसँग भेटवार्ता गरेको हो ।
भाजपा विदेश विभाग प्रमुख विजय चौथाइवालेले प्रेस विज्ञप्ति जारी गर्दै भेटघाटबारे जानकारी दिएका हुन् । 'भाजपालाई चिनौँ' कार्यक्रमअन्तर्गत रास्वपा नेतृत्व नयाँदिल्ली भ्रमणमा रहेको उनले बताएका छन् ।
प्रतिनिधिमण्डललाई स्वागत गर्दै भाजपा अध्यक्ष नवीनले नेपाल र भारतबीचको ऐतिहासिक सम्बन्धका बारेमा चर्चा गरेका थिए । उनले दुई देशबीच नागरिकस्तरमा मात्र नभई सभ्यताको विरासत उस्तै रहेको बताए । साथै यस्ता भेटघाट र अन्तरक्रियाले रास्वपा र भाजपाबीच पार्टी-पार्टी सम्बन्ध बलियो बनाउने नवीनको भनाइ थियो । भेटमा अध्यक्ष नवीनले भाजपाको इतिहास, विचारधारा र संगठनात्मक संरचना र नागरिककेन्द्रित राजनीतिक सहभागिताबारे पनि चर्चा गरेका थिए ।
KNOW BJP पहलअन्तर्गत भाजपा मुख्यालयमा राष्ट्रिय स्वतन्त्र पार्टी (RSP) नेपालका सभापति श्री रवि लामिछानेज्यू तथा उहाँसँग आउनुभएको प्रतिनिधिमण्डललाई स्वागत गर्न पाउँदा र उहाँहरूसँग संवाद गर्न पाउँदा खुशी लागेको छ।
— Nitin Nabin (@NitinNabin) June 2, 2026
BJP–RSP बीच पार्टी-टु-पार्टी सम्बन्धलाई अझ सुदृढ बनाउने विषयमा… pic.twitter.com/gqag5ioz1k
भेटमा रास्वपा प्रतिनिधिमण्डलले भाजपाको सदस्यता वितरण प्रक्रिया, उम्मेदवार छनोट प्रणाली र कार्यकर्तास्तरमा पार्टीको समन्वयका बारेमा बुझेको थियो ।
चौथाइवालेका अनुसार नवीनले भारतीय प्रधानमन्त्री नरेन्द्र मोदीको नेतृत्वको सरकारले विकासकेन्द्रित शासनमा ध्यान दिएको बताएका थिए ।
दुवै नेताले भेटमा राजनीतिमा जेन-जीको बढ्दो भूमिकाका बारेमा कुराकानी भएको विज्ञप्तिमा उल्लेख छ । लोकतान्त्रिक सहभागिता र भविष्यको नेतृत्वमा जेन-जीहरूको भूमिकाबारे पनि उनीहरूबीच कुराकानी भएको थियो ।
भेटमा नवीनसँगै भाजपाका महासचिव अरुण सिंह र नेताहरू बाँसुरी स्वराज, विजय चौथाइवालेलगायत उपस्थित थिए ।
