रास्वपा सभापति लामिछाने भाजपा अध्यक्ष नितिन नवीनलगायतसँगको उच्चस्तरीय भेटवार्तामा सरिक हुने, अयोध्यासमेत जाने
What you should know
काठमाडौँ — रास्वपा सभापति रवि लामिछाने भारत भ्रमणका लागि सोमबार मध्याह्न नयाँदिल्ली प्रस्थान गरेका छन् । रास्वपाको नेतृत्वमा सरकार गठन भएपश्चात सभापति लामिछानेको यो पहिलो औपचारिक भारत भ्रमण हो ।
भ्रमण टोलीमा लामिछानेकी श्रीमती निकिता पौडेल, सहमहामन्त्री विपिन आचार्य र सचिवालय सदस्य दीपक बोहरा र प्रदीप आचार्य रहेका छन् ।
सत्तारुढ दलका प्रमुखको यस भ्रमणलाई राजनीतिक वृत्तमा विशेष चासो र महत्त्वका साथ हेरिएको छ । भ्रमणका क्रममा सभापति लामिछानेले भारतीय प्रधानमन्त्री नरेन्द्र मोदीसँग उच्चस्तरीय भेटवार्ता हुने भनिए पनि दुवै आधिकारिक रूपमा भने यसको जानकारी गराइएको छैन । भारतीय सत्तारुढ दल भाजपाले आइतबार जारी गरेको प्रेस विज्ञप्तिमा भने सभापति लामिछानेले पार्टीका राष्ट्रिय अध्यक्ष नितिन नवीन र अन्य शीर्ष नेताहरूलाई भेट्ने उल्लेख छ ।
अध्यक्ष नवीनकै निम्तोमा लामिछानेको भ्रमण हुन लागेको समेत विज्ञप्तिमा उल्लेख छ । आइतबार नै रास्वपाले पनि विज्ञप्ति जारी गर्दै सभापति लामिछानेको भ्रमणबारे औपचारिक रूपमा जानकारी गराएको थियो । रास्वपा प्रवक्ता मनीष झाले जारी गरेको विज्ञप्तिमा लामिछाने दिल्लीमा उच्चस्स्तरीय भेटवार्तामा सहभागी हुने उल्लेख छ ।
उच्चस्तरीय भेटवार्ताका लागि दिल्लीस्थित नेपाली राजदूतावासले समन्वय गरिरहेको पनि झाले बताएका छन् । साथै व्यक्तिगत भ्रमणका रूपमा लामिछाने अयोध्यासमेत पुग्ने कार्यक्रम रहेको छ । साथै दिल्लीमा प्रवासी नेपाली सम्पर्क, मञ्चको कार्यक्रममा समेत उनी सहभागी हुनेछन् । दिल्लीको लाजपतनगरस्थित लाजपत भवन अडिटोरियममा २१ गते दिउँसो ३ बजे लामिछानेको स्वागत कार्यक्रम राखिएको छ ।
लामिछानेको भ्रमणले दुई देशबीचको राजनीतिक सम्बन्ध र आपसी हितका विषयमा संवाद हुने अपेक्षा गरिएको छ ।
