काठमाडौँ — प्रतिनिधिसभामा विपक्षी दलहरूले प्रधानमन्त्री वालेन्द्र शाहको उपस्थिति माग गरेर वेल घेराउ गरेका छन् । 

बिहीबार बेलुकी बसेको दोस्रो बैठकमा सभामुख डोलप्रसाद अर्यालले विपक्षीको अवरोधबीच प्रधानमन्त्री,  गृहमन्त्री, विज्ञान प्रविधि तथा नवप्रवर्तन मन्त्री वालेन्द्र शाहको तर्फबाट कानुनमन्त्री सोबिता गौतमलाई विधेयक प्रस्तुत गर्न दिएपछि एमाले, नेकपा, राप्रपालगायत दलका सांसदहरु वेल घेराउ गर्दै नाराबाजीमा उत्रिएका हुन् । कांग्रेस सांसदहरुले भने आ-आफ्नो स्थानबाट उठेर विरोध जनाएका छन् । 

विपक्षीको नाराबाजीबीच बैठक कार्यसूचीमा प्रवेश गराइएको छ । 

प्रधानमन्त्रीको उपस्थितिको माग गर्दै पहिलो बैठकमा पनि विपक्षी दलहरुले विरोध जनाएका थिए । पहिलो बैठकमा विपक्षीको अवरोध नहटेपछि सभामुख अर्यालले १५ मिनेट बैठक स्थगित गरेका थिए । 

बैठकमा विधेयक पेस गर्ने समय आएपछि विपक्षी दलहरूले प्रधानमन्त्री शाहलाई संसद्मा उपस्थित गराउन सभामुखबाट रुलिङ माग गरेका थिए । प्रतिनिधिसभाको नियमावलीको नियम ५६ बमोजिम प्रधानमन्त्रीलाई संसदमा बोलाउन विपक्षी सांसदले प्रधानमन्त्रीलाई सदनमा बोलाएका हुन् । एमाले, नेकपा, श्रम संस्कृति र राप्रपाका सांसदले नियम ५६ अनुसार प्रधानमन्त्रीसँग प्रश्नोत्तर कार्यक्रम गराउन सभामुखबाट रुलिङ माग गरेका थिए ।