अध्यक्ष केपी शर्मा ओली निवास, गुन्डुमा सोमबार बसेको केन्द्रीय सचिवालय बैठकले पूर्वराष्ट्रपति विद्यादेवी भण्डारीको सदस्यता नवीकरण गर्ने निर्णय गरेको उपमहासचिव लेखराज भट्टले जानकारी दिए ।
काठमाडौँ — एमालेले पूर्वराष्ट्रपति विद्या भण्डारीको पार्टी सदस्यतालाई निरन्तरता दिने निर्णय गरेको छ । सोमबार अध्यक्ष केपी शर्मा ओली निवास, गुन्डुमा बसेको केन्द्रीय सचिवालय बैठकले भण्डारीको सदस्यता नवीकरण गर्ने निर्णय गरेको उपमहासचिव लेखराज भट्टले जानकारी दिए ।
‘आज एउटा महत्त्वपूर्ण निर्णय भएको छ । पूर्वराष्ट्रपति विद्या भण्डारीलाई सदस्यता दिने निर्णय भएको छ,’ उनले भने ।
गत वर्ष साउन ५ र ६ मा बसेको केन्द्रीय कमिटीले भण्डारीको सदस्यता ‘पेन्डिङ’ राखेको थियो । त्यसपछि एमालेमा विवाद चुलिएको थियो ।
साउन ८ मा भण्डारीले पत्रकार सम्मेलन गरी आफूले सदस्यता नवीकरण गरिसकेकाले खोस्न नसक्ने भन्दै असन्तुष्टि जनाएकी थिइन् । त्यसको एक वर्षअघि नै केन्द्रीय कार्यलय च्यासल गएर भण्डारीले सदस्यता नवीकरण गरे पनि केन्द्रीय कमिटीले त्यसलाई मान्यता दिएको थिएन ।
गत वर्ष साउन ५ र ६ को केन्द्रीय कमिटीले पूर्वराष्ट्रपति भण्डारीलाई सक्रिय राजनीतिमा आउन नहुने निष्कर्ष निकालेको थियो । राष्ट्रपतिको भूमिका अत्यन्त सम्मानित, गरिमायुक्त र ऐतिहासिक महत्त्वको भएकाले दलीय आबद्धताबाट पूर्ण रूपमा मुक्त रहेकोले दलीय राजनीतिमा फर्कने निर्णय संविधानको मर्म विपरीत भएको निष्कर्ष निकालेको थियो ।
