काठमाडौँ — कांग्रेस सांसद अर्जुननरसिंह केसीले सरकारको नीति तथा कार्यक्रममाथिको छलफललाई ६ घण्टामा सीमित गरिनु संसद्को अपमान भएको बताएका छन् । 

प्रतिनिधिसभामा बिहीबार भएको नीति तथा कार्यक्रममाथिको छलफलमा उनले विगतमा नीति तथा कार्यक्रममाथि न्यूनतम तीन दिनदेखि एक सातासम्म गम्भीर छलफल हुने गरेको बताएका हुन् । 

'सरकारको नीति तथा कार्यक्रममा यसअघि ३ दिन देखि १ हप्तासम्म गम्भीर रूपमा छलफल भएको छ । संशोधन प्रस्तुत गर्नेहरुले पनि विभिन्न ढंगले आफ्ना कुराहरू राख्ने गरेका छन् । बहुमतले अन्तिममा पास त भइहाल्छ । तर यसको अहिलेसम्मको परम्परा न्यूनतम ३ दिनदेखि एक हप्तासम्म छलफल गर्ने थियो... सम्पूर्ण रूपमा जुनसुकै पक्षको भए पनि सांसदहरूको आवाजलाई निस्तेज गरेर ६ घण्टाभित्र सीमित गरिएको छ । यो संसदीय परम्परा, मर्यादा र संसद्को अपमानको रुपमा मैले लिएको छु,' केसीले भने ।