‘पपुलिज्मको नाममा संविधानवाद र लोकतन्त्रका आधारस्तम्भ र हाम्रा मूल्य मान्यताहरूमा एकपछि अर्को आक्रमण निरन्तर भइरहेको अवस्था छ,’ खड्काले भनेका छन्, ‘यस्तो अवस्थामा पार्टीको बृहत् र सम्पूर्ण एकता नभई हामी राष्ट्रिय राजनीतिमा प्रभावकारी, हस्तक्षेपकारी र सार्थक भूमिका खेल्न सक्दैनौं । त्यसैले पार्टीको बृहत् र सम्पूर्ण एकता गर्ने जिम्मेवारी मूलतः गगनजी र दोस्रोमा विश्वजीको हातमा छ, त्यसमा हामी अरूको सहयोगी भूमिका हुन्छ ।’

उनले सभापति गगन र उपसभापति शर्मासँगको भेटमा पार्टी एकतालाई सर्वाधिक प्राथमिकतामा राखेर लाग्न आग्रह गरेको पनि बताएका छन् । ‘विभाजित कांग्रेसले विगतमा धेरै ठूलो हन्डर मात्र खानु परेन, हामीले आम नागरिकको भरोसा र विश्वास पनि गुमाउन पुग्यौं । त्यसैले त्यतिबेला जिम्मेवारीमा रहेका शीर्ष नेता र भूमिकामा रहेका दुवैतर्फका सबैले आत्मसमीक्षा गर्दै पार्टीलाई बृहत् र सम्पूर्ण रूपमा संगठनात्मक र भावनात्मक एकता गराएर अगाडि बढेको इतिहासको अनुभव हामीसँग छ,’ खड्काले भनेका छन्, ‘२१ फागुनमा सम्पन्न आमनिर्वाचनमा प्राप्त परिणामले झस्काएको मात्रै होइन, ठूलो क्षति समेत बेहोर्नुपर्‍यो । यसबाट सबक सिक्दै हामीले नयाँ सोच, दृष्टिकोण र साझा भावधारासहित सम्पूर्ण एकताबाट अगाडि बढ्न प्रेरणा लिनुपर्ने घडीमा उभिएका छौं ।’