सचिव राईले भने- 'सभामुखले सोधेका प्रश्नको मैले सैद्धान्तिक जवाफ दिएको छु ।'
What you should know
काठमाडौँ — सभामुख डीपी अर्यालले प्रतिनिधिसभाका सचिव हर्कराज राईलाई पदबाट हटाउनका लागि दोस्रोपटक स्पष्टीकरण सोधेका छन् । पहिलोपटक सोधेको स्पष्टीकरणको जवाफ चित्तबुझ्दो नभएको भन्दै सभामुख अर्यालले सचिव राईलाई दोस्रोपटक स्पष्टीकरण सोधेका हुन् ।
सभामुख अर्यालका प्रमुख स्वकीय सचिव मुना कुँवरले मंगलबार दोस्रोपटक स्पष्टीकरण सोधिकएको बताइन् । आफ्नो काम गर्ने तौरतरिकासँग मिल्ने मान्छे ल्याउनका लागि सभामुखले सचिव राईलाई हटाउन खोजेका हुन् । स्वकीय सचिव कुँवरले भनिन्, 'आफ्नो स्पीडमा हिँड्ने मान्छे खोज्नुभएको हो । त्यो नमिलेको (सचिव राईसँग) हो कि जस्तो लागेर स्पष्टीकरण सोधेको जस्तो लागेको छ ।'
सचिव राईले प्रतिनिधिसभामा सांसदहरूलाई बोल्नका लागि छुट्याइएको समय पक्षपातपूर्ण भएको भन्दै सभामुख अर्यालले स्पष्टीकरण सोधेका थिए । सचिवालयमा सचिवका रूपमा गर्नुपर्ने कामका लागि आफूसँग समन्वय नगरेको भन्दै अर्यालले राईलाई स्पष्टीकरण सोधेका थिए । सचिव राईले पहिलोपटक सोधिएको स्पष्टीकरणको जवाफ बुझाइसकेको बताए । 'सभामुखले सोधेका प्रश्नको मैले सैद्धान्तिक जवाफ दिएको छु,' सचिव राईले भने ।
सचिव राईले सभामुखबाट दोस्रोपटक स्पष्टीकरण सोधिएको पत्र भने आफूकहाँ आइनपुगेको बताए । उनले राईले तत्काल राजीनामा भने नगर्ने भएका छन् । सभामुखले सोधेको स्पष्टीकरणको जवाफ दिइसकेकाले राजीनामा नगर्ने जानकारी सभामुखलाई दिइसकेका छन् । अब सभामुखसँग सचिव राईका सम्बन्धमा दुई विकल्प रहेको संसद् सचिवालयका एक वरिष्ठ अधिकारीले बताए ।
'पहिलो, सचिव राईले दिएको जवाफमा चित्त बुझाएर काम गर्न दिने । दोस्रो, स्पष्टीकरणको जवाफ चित्तबुझ्दो नभएको भन्दै सचिव राईलाई पदमुक्त गर्न राष्ट्रपतिकहाँ सिफारिस गर्ने,' ती अधिकारीले भने ।
प्रतिनिधिसभाको सचिव पद संवैधानिक हो । सभामुखको सिफारिसमा प्रतिनिधिसभाको सचिव राष्ट्रपतिले नियुक्त गर्ने संवैधानिक व्यवस्था छ । सचिव राईलाई तत्कालीन सभामुख देवराज घिमिरेले सचिव पदमा नियुक्तिका लागि राष्ट्रपतिकहाँ सिफारिस गरेका थिए । त्यसअघि उनी तत्कालीन भौतिक पूर्वाधार तथा यतायातमन्त्री देवेन्द्र दाहालको सचिवालयमा कार्यरत थिए ।
