काठमाडौँ — राष्ट्रिय स्वतन्त्र पार्टीको महामन्त्रीमा भूपदेव शाह चयन भएका छन् । रास्वपा केन्द्रीय समितिको सोमबारको बैठकले शाहलाई महामन्त्रीमा चयन गरेको हो । 

रास्वपा प्रवक्ता मनिष झाकाअनुसार पार्टी सभापति रवि लामिछानेले शाहलाई महामन्त्रीको जिम्मेवारी दिने प्रस्ताव केन्द्रीय समिति बैठकमा राखेका थिए । झाले भने, 'महामन्त्रीमा भुपदेव शाह, सचिवालय सदस्यमा सागर ढकाल र सरिता श्री ज्ञवालीलाई सभापतिबाट प्रस्तावित भयो र केन्द्रीय समितिबाट अनुमोदन भयो ।'

रास्वपाको महामन्त्रीमा कबिन्द्र बुर्लाकोटी कार्यरत छन् । रास्वपामा दुई महामन्त्री बनाउने भनिएकोमा दोस्रो महामन्त्रीमा शाहलाई ल्याइएको हो । बुर्लाकोटीलाई रास्वपा संसदीय दलमा मुख्य सचेतकको जिम्मेवारी दिइएको छ । 

रास्वपा वरिष्ठ नेता तथा प्रधानमन्त्री वालेन्द्र शाहसँगै भूपदेव शाह रास्वपामा प्रवेश गरेका थिए । उनले यसअघि केन्द्रीय सदस्यको जिम्मेवारी सम्हाल्दै आएका थिए । उनलाई सहमहामन्त्री बनाउने र सुनिल लम्साललाई महामन्त्रीको जिम्मेवारी दिने समझदारी बनेको थियो ।