पोखरा — गण्डकी प्रदेश सरकारको मन्त्रिपरिषद् हेरफेर हुँदा मन्त्रीको सूचीमा आफ्नो नाम नसमेटिएको झोंकमा बुधबार राजीनामा दिएका प्रदेशसभा सदस्य दोर्णकुमार कुँवरले बिहीबार राजीनामा फिर्ता लिएका छन् । बुधबार मन्त्रिपरिषद् हेरफेरसँगै सभामुख कृष्णप्रसाद धिताललाई इमेलमार्फत राजीनामा पठाएका सांसद कुँवरले बिहीबार फोन गरी राजीनामा फिर्ता लिएको बताएका हुन् ।

बागलुङ २(२) बाट निर्वाचित कांग्रेस सांसद कुँवर मन्त्रीका आकांक्षी थिए । मुख्यमन्त्री सुरेन्द्रराज पाण्डेले बागलुङ २(१) बाट निर्वाचित कांग्रेस सांसद जितबहादुर शेरचनलाई आर्थिक मामिला मन्त्री नियुक्त गरेपछि कुँवर रुष्ट थिए । उनले सभामुख र संसद् सचिवालयका कर्मचारीलाई इमेलमार्फत राजीनामा पठाएका थिए । ‘हामीलाई स्वयं सांसद उपस्थित भएर राजीनामाको हार्डकपी उपलब्ध नभएकोले संसद् सचिवालयमा दर्ता भएको थिएन,’ सभामुख धिताले भने, ‘आज उहाँले नै फोन गरेर राजीनामा फिर्ता लिने जानकारी गराउनुभयो ।’