रास्वपाले समर्थन गर्ने कुरा थिएन, उहाँहरूले पनि समर्थन गरेर सरप्राइज दिनुभएको छ : रुबीकुमारी ठाकुर
काठमाडौँ — प्रतिनिधिसभाको उपसभामुख पदमा उम्मेदवारी दिएकी श्रम संस्कृति पार्टीकी सांसद रुबीकुमारी ठाकुरले आफूलाई पार्टीले ठूलो जिम्मेवारी दिएको प्रतिक्रिया दिएकी छिन् ।
उम्मेदवारी दर्तापछि बिहीबार पत्रकारहरूसँग कुराकानी गर्नेक्रममा २५ वर्षीया रुबीले आफूलाई ठूलो जिम्मेवारी दिए पनि पूरा गर्नसक्ने बताइन् । सत्तारुढ दल रास्वपाले आफूलाई समर्थन गरेर सरप्राइज दिएको दिएको उनको भनाइ छ ।
उनले रास्वपाको समर्थनमा बिहीबार संघीय संसद् सचिवालयमा उम्मेदवारी दर्ता गराएकी हुन् ।
यस्तो छ रुबीको प्रतिक्रिया
रास्वपाले समर्थन गर्ने कुरा थिएन, उहाँहरूले पनि समर्थन गरेर सरप्राइज दिनुभएको छ, धेरै धेरै धन्यवाद दिन चाहन्छु । म मधेशको छोरी हो, मधेशको छोरीलाई अगाडि बढाउन उहाँहरूले सहयोग गर्नुभएको होला । म अध्यक्षज्यूलाई पनि धन्यवाद भन्न चाहन्छु, म भुँईको मान्छेलाई यति माथिसम्म पुर्याउनु भयो ।
मैले कल्पना पनि गरेको थिइनँ, यहाँसम्मका लागि । मलाई खुसी लागिरहेको छ, मलाई अलि ठूलो जिम्मेवारी भयो तर म सक्छु । म देशलाई चाहिने सबैथोक गर्छ, सधैं साथ दिन्छु ।
