काठमाडौँ — राष्ट्रिय सभा अन्तर्गतका चार संसदीय समितिका सभापतिहरूले पद तथा गोपनियताको शपथ ग्रहण गरेका छन् । सभाका अध्यक्ष नारायणप्रसाद दाहालले बुधबार संघीय संसद् सचिवालयमा आयोजित कार्यक्रममा चारवटै संसदीय समिति सभापतिलाई पद तथा गोपनियताको शपथ ग्रहण गराएका हुन् ।

राष्ट्रिय सभाका चार समितिका सभापतिको निर्वाचन मंगलबार भएको थियो । चारवटै सभापति सर्वसम्मत निर्वाचित भएका थिए । समिति सभापतिमा कांग्रेस, नेकपा र जसपा नेपालबीच सहमति भएको थियो । 

जसअनुसार विकास, आर्थिक मामिला तथा सुशासन समितिको सभापतिमा कांग्रेसका कृष्णप्रसाद पौडेल, विधायन व्यवस्थापन समितिको सभापतिमा कांग्रेसकै कृष्णबहादुर रोकाय निर्वाचित भएका थिए । 

सार्वजनिक नीति तथा प्रत्यायोजित विधायन समितिको सभापतिमा माननीय जसपा नेपालकी पूजा चौधरी र संघीयता सबलीकरण तथा राष्ट्रिय सरोकार समितिको सभापतिमा नेकपाकी जयन्तीदेवी राई निर्विरोध निर्वाचित भएका थिए ।