नेपालगञ्ज — प्रतिनिधिसभा सदस्य मोहम्मद इस्तियाक राईले बाँकेको समग्र विकासका लागि विभिन्न महत्त्वपूर्ण विषय उठाउँदै प्रधानमन्त्री वालेन्द्र शाहसमक्ष ध्यानाकर्षण-पत्र बुझाएका छन् ।

लुम्बिनी प्रदेशका सांसदहरूसँग सोमबार भएको छलफलमा प्रतिनिधिसभा सदस्य राईले स्वास्थ्य, शिक्षा, पूर्वाधार र बाँकेको समग्र विकासलाई समेटेर २० बुँदे योजना पेस गरेको बताए। 'पूर्वाधार, स्वास्थ्य, शिक्षा तथा सामाजिक क्षेत्रका सुधारका लागि प्राथमिकताका साथ योजना अघि बढाउन आग्रह गरेको छु,' उनले भने ।

पूर्वाधारतर्फ नेपालगञ्ज–नयाँ दिल्ली सीधा हवाई उडान सञ्चालनका लागि आवश्यक पहल गर्न, नेपालगञ्जमा आधुनिक क्रिकेट रंगशाला निर्माण गर्न तथा एकीकृत भन्सार जाँच चौकी (आईसीपी)लाई स्तरोन्नति गरी सुक्खा बन्दरगाहका रूपमा विस्तार गर्न माग गरिएको छ।

साथै नौबस्ता औद्योगिक क्षेत्रलाई पूर्ण रूपमा सञ्चालनमा ल्याउन र बाढी तथा डुबान नियन्त्रणका लागि राप्ती नदी लगायतका क्षेत्रमा तटबन्ध निर्माण गर्नुपर्ने आवश्यकता औंल्याइएको छ। स्वास्थ्य क्षेत्रतर्फ भेरी अस्पताललाई विशिष्टीकृत अस्पतालका रूपमा स्तरोन्नति गर्नुपर्ने, चिकित्सक तथा प्राविधिक जनशक्ति अभाव हटाउनुपर्ने र गम्भीर रोगको उपचारका लागि आवश्यक सेवा विस्तार गर्नुपर्नेमा जोड दिइएको छ। साथै पालिकास्तरका अस्पताल तथा स्वास्थ्य चौकीहरूलाई आधुनिक बनाउँदै प्रसूति सेवासहितको सुविधा विस्तार गर्नुपर्ने उल्लेख गरिएको छ।