काठमाडौँ — एमाले अध्यक्ष केपी शर्मा ओली पक्राउको विरोधमा देशका विभिन्न जिल्लामा प्रदर्शन गरिएको छ । 

पूर्वप्रधानमन्त्रीसमेत रहेका ओलीलाई पक्राउ गरिएकोमा सडक संघर्ष गर्ने सचिवालय बैठकको निर्णयसँगै कार्यकर्ताहरु काठमाडौंलगायत देशभर प्रदर्शनमा उत्रिएका छन् । 

एमालेमा विभिन्न जनसंगठनमा आबद्ध कार्यकर्ताहरुले दिउँसो ३ बजेदेखि माइतीघरमा भेला भएर प्रदर्शन गरेका छन् । एमाले कार्यकर्ताले ओलीको रिहाइको माग गर्दै गृहमन्त्रीको राजीनामा मागेका छन् । सडकका डिभाइडर तोडफोड गर्दै टायर बालेर प्रदर्शन गरेका कारण सडकमा सवारीसाधन ठप्प छ । टायर र डिभाइड जम्मा पारेर कार्यकर्ताले जलाउँदा प्रहरीले त्यसलाई रोक्ने प्रयास गरेको छ ।

कान्तिपुर संवाददाता प्रताव विष्टका अनुसार हेटौंडामा एमालेका नेता–कार्यकताहरुले विरोध जुलुस निकालेका छन् । हेटौंडा उपमहानगरपालिका-५ स्थित पार्टी कार्यालयबाट निस्केको जुलुसले नगर परिक्रमा गर्दै अध्यक्ष ओलीलाई रिहा गर भन्दै नारा लगाएका थिए । नगर परिक्रमापछि बुद्धचोकमा भएको भेलालाई सम्बोधन गर्दै युवा नेता राजेश नगरकोटीले पार्टी अध्यक्ष ओलीलाई बिनासर्त रिह नगरे वर्तमान सरकारले ठूलो मूल्य चुकाउनु पर्ने चेतावनी दिएका थिए । 

सप्तरीको राजविराज बजारमा पनि एमाले नेता–कार्यकर्ताले प्रदर्शन गरेका छन् । उनीहरुले सरकारविरुद्ध चर्को नाराबाजी गर्दै पार्टी अध्यक्ष र पूर्वगृहमन्त्री रमेश लेखकलाई तत्काल रिहाइ गर्न माग गरे ।

पार्टी कार्यालयबाट निकालिएको र्‍याली बजारमा प्रदर्शन गर्दै नेता चोकमा गरिएको कोणसभामा नेताहरुले पार्टी अध्यक्ष ओलीलाई गैरकानुनी र अलोकतान्त्रिक ढंगले पक्राउ गरिएको दाबी गरेका कान्तिपुर संवाददाता विद्यानन्द रामले जनाएका छन् ।

यस्तै चितवन भरतपुरको चैबिसकोठी चोकमा शनिबार दिउँसो एमालेमा आबद्ध विभिन्न संघ संगठनहरुले विरोध प्रदर्शन गरेका छन् । कान्तिपुर संवादादता रमेशकुमार पौडेलका अनुसार प्रदर्शनमा एमाले युवा संघ, विद्यार्थी संगठनलगायतका संगठनका प्रमुख, प्रतिनिधिहरु तथा पार्टीका नेताहरु सहभागी थिए । केन्द्रीय परिपत्रअनुसार प्रदर्शन गरेको एमाले चितवनले जनाएको छ ।

सुर्खेत संवाददाता तृप्ति शाहीका अनुसार एमाले सुर्खेतले अध्यक्ष पक्राउको विरोधमा वीरेन्द्रनगरमा प्रदर्शन गरेको छ । 

पार्टी अध्यक्ष ओली पक्राउको विरोधमा रामेछापमा एमाले कार्यकर्ताहरू आन्दोलित बनेका छन् । शनिबार सदरमुकाम मन्थलीस्थित पार्टी कार्यालय अगाडि सडकमा उत्रिएर उनीहरूले प्रदर्शन गरेका हुन् ।

प्रदर्शनका क्रममा कार्यकर्ताहरूले कार्की आयोगको प्रतिवेदन जलाउँदै सरकारविरुद्ध कडा नाराबाजी गरेका छन् । उनीहरूले वर्तमान सरकारको कदमलाई राजनीतिक प्रतिशोधको संज्ञा दिँदै आन्दोलन अझै चर्काउने चेतावनीसमेत दिएका छन् । साथै, प्रधानमन्त्री बालेन्द्र शाह नेतृत्वको सरकारको पहिलो निर्णय नै पूर्वाग्रही र प्रतिशोधपूर्ण भएको आरोप लगाउँदै गृहमन्त्री सुदन गुरुङको राजीनामा माग गरेका कान्तिपुर संवाददाता नवराज श्रेष्ठले जनाएका छन् । 

यसैगरी सिरहामा एमालेका भ्रातृ संगठनहरूले प्रदर्शन गरेका छन् । राष्ट्रिय युवा संघ, अनेरास्ववियु र नेशनल भोलेन्टियर फोर्सले सदरमुकाममा प्रदर्शन गरेको कान्तिपुर संवाददाता विनय आजादले जनाएका छन् ।