काठमाडौँ —  बालेन्द्र शाहले प्रधानमन्त्रीको पद तथा शपथ लिएका छन्। उनीसँगै उनको मन्त्रीमण्डलका सदस्यहरुले पनि पद तथा गोपनीयताको शपथ लिएका छन्। 

शीतल निवासमा आयोजित विशेष शपथ समारोहमा राष्ट्रपति रामचन्द्र पौडेलले शाह र उनको मन्त्रीमण्डलका सदस्यहरुलाई शपथ खुवाएका हुन्।

रास्वपाका धेरै नेताको दाबी रहेको गृह मन्त्रालयको जिम्मेवारी सुधन गुरुङले पाएका छन्। जेन–जी आन्दोलनका बेला चर्चामा आएका गुरुङ गोरखा–१ बाट निर्वाचित भएका थिए। 

त्यस्तै रास्वपाका उपसभापति स्वर्णिम वाग्ले अर्थमन्त्री बन्ने भएका छन्। उनी अर्थ मामिलाका जानकार हुन्। उनी तनहुँबाट दुई पटक प्रतिनिधिसभा सदस्य निर्वाचित भएका छन्। 

त्यस्तै शिशिर खनाल परराष्ट्रमन्त्री बन्ने भएका छन्। उनी रास्वपाको परराष्ट्र विभाग प्रमुख हुन्। 

खडकराज पौडेल (गणेश) संस्कृति, पर्यटन तथा नागरिक उड्डयनमन्त्री बन्ने बनेका छन्। साहित्यकार समेत रहेका उनी कास्कीबाट निर्वाचित भएका थिए। त्यस्तै, श्रममन्त्री महोत्तरीका दीपक साह बन्ने भएका छन्।

शिक्षा तथा प्रविधि मन्त्री भने काठमाडौं–५ बाट निर्वाचित सस्मित पोखरेल बनेका छन्। सूचना, सञ्चार तथा प्रविधि मन्त्रालयको जिम्मेवारी बिक्रम तिमिल्सिनाले पाएका छन्। 

प्रतिभा रावल सामान्य प्रशासन मन्त्री भएकी छिन्। उनी पत्रकारिता पृष्ठभूमिकी हुन्। उनलाई रास्वपाले समानुपातिकबाट सांसद बनाएको थियो। रावल रास्वपाकी सहप्रवक्ता समेत हुन्। 

ऊर्जा, जलस्रोत तथा सिँचाइ मन्त्रालयको जिम्मेवारी विराजभक्त श्रेष्ठले पाएका छन्। काठमाडौंबाट निर्वाचित भएका उनी यसअघि रास्वपा संसदीय दलको नेतासमेत थिए। 

कृषि तथा सहकारी र वन मन्त्रालयको जिम्मेवारी भने गीता चौधरीलाई दिइने भएको छ। उनी रास्वपाको सामानुपातिक सूचीमा निर्वाचित भएकी उनलाई मन्त्रालय बाँडफाँटमा कृषि मन्त्रालयको जिम्मेवारी दिइएको हो। अधिवक्तासमेत रहेकी उनी गत फागुनको निर्वाचनभन्दा केही दिनअघि मात्र रास्वपामा प्रवेश गरेकी थिइन् ।