काठमाडौँ — रास्वपा सभापति रवि लामिछानेले घरघर डुलेर सांसद पद नपाइने बताएका छन् । आइतबारको सचिवालय बैठकमा सभापति लामिछानेले पार्टीले सबैको विषयमा राम्रो निर्णय गरेको बताएका हुन् । 

बैठकमा सहभागी एक सदस्यका अनुसार रविले बैठकमा पार्टीले कसैलाई पनि अन्याय नगर्ने बताएका थिए । 'पदका लागि घरघरमा धाउने काम नगर्न सांसदहरूलाई भनिदिनुहोला, त्यही प्रथाको विरोध गरेर हामी आएका हौँ,' उनले बैठकमा भनेका थिए । 

साथै सचिवालयले ४८ जना महिला र ९ जना पुरुषको नाम समानुपातिक सांसद पदका लागि प्रस्ताव गर्दै निर्वाचन आयोगमा पठाएको छ । आयोगले रुजु गरेर प्रमाणित नगरेसम्म नाम सार्वजनिक नगर्न पनि उनले आग्रह गरे । उनले भने, 'समानुपातिकको सूची सार्वजनिक नगरियोस् । निर्वाचन आयोगले रुजु गरेपछि मात्रै सार्वजनिक गर्ने हो । कसैको नाम सार्वजनिक भएपछि आयोगमा मिलाउँदा सांसद बन्न नपाए सम्बन्धित व्यक्तिलाई गाह्रो हुन्छ ।'