काठमाडौँ — प्रतिनिधिसभा निर्वाचनमा करिब ६० प्रतिशत मतदान भएको छ । समानुपातिकतर्फ बुधबार सम्पन्न मतगणनाले करिब ६० प्रतिशत मतदान भएको देखाएको हो । निर्वाचन आयोगका सचिव कृष्णबहादुर राउतले समानुपातिकतर्फ मतगणना सम्पन्न हुँदा ५९.८४ प्रतिशतले मतदान गरेको बताए ।

जबकि आयोगले २१ फागुनमा मतदानको साँझ ५८ प्रतिशत मतदान भएको जनाएको थियो । ‘प्रारम्भमा प्रहरीबाट आएका विवरण सार्वजनिक गरिएको थियो । त्यही बेला निर्वाचन अधिकृतको कार्यालयबाट थप विवरण प्राप्त भएपछि सोहीबमोजिम परिमार्जन गर्ने भनेका थियौं,’ राउतले भने, ‘समानुपातिकतर्फको सबै मतको गणना सकिएपछि मतदानको यकिन प्रतिशत आएको हो ।’

आयोगका अनुसार कुल १ करोड ८९ लाख ३ हजार ६ सय ८९ मतदातामध्ये १ करोड १३ लाख १२ हजार ४ सय ५५ जना मतदानमा सहभागी भएका छन् । आयोगले २१ फागुनमा दिएको प्रारम्भिक जानकारीमा १ करोड ९ लाख ७७ हजार ७ सय ११ जनाले मतदान गरेको जनाएको थियो । उक्त संख्या कुल मतदाताको ५८.०७ प्रतिशत हो । समानुपातिकतर्फ खसेको कुल मतमा ४.१० प्रतिशत मत बदर भएको छ । बदर मतको संख्या ४ लाख ६३ हजार ३ सय ७३ छ । सदर मत १ करोड ८ लाख ४९ हजार ८२ छ । प्रत्यक्षतर्फ भने पाँच प्रतिशतभन्दा बढी मत बदर भएको आयोगले जनाएको छ ।

सदर मतको ३ प्रतिशत कटाउने राजनीतिक दल समानुपातिकतर्फ सिट हकदार हुने कानुनी व्यवस्था छ । यसरी हेर्दा यस पटक ३ लाख २६ हजार बढी मत ल्याउने पार्टीले सिट पाउने भएका छन् । त्यसरी सिट पाउनेमा राष्ट्रिय स्वतन्त्र पार्टी (रास्वपा), कांग्रेस, एमाले, नेपाली कम्युनिस्ट पार्टी (नेकपा), श्रम संस्कृति पार्टी र राष्ट्रिय प्रजातन्त्र पार्टी (राप्रपा) छन् ।

आयोगले बुधबार रातिसम्ममा १ करोड ८ लाख ३० हजार ८ सय १५ मतको विवरण सार्वजनिक गरेको छ । गणना भइसकेको १८ हजार २ सय ६७ मतको प्रामाणिक विवरण अपलोड गर्न बाँकी छ । अन्तिम प्रामाणिक विवरण प्राप्त भए पछि आयोगले सिट बाँडफाँट गरेर त्यसअनुसार समावेशी समूह र महिलाको संख्या मिलाएर निर्वाचित हुने उम्मेदवारको नाम बन्दसूचीको क्रमअनुसार पठाउन दलहरूलाई मंगलबार नै पत्राचार गर्ने तयारी गरेको थियो । तर, जिल्लामा मतगणना र गणनाको प्रामाणिक विवरण आउन भएको ढिलाइले दललाई पत्राचार गर्न नसकिएको सचिव राउतले बताए ।