काठमाडौँ — प्रतिनिधिसभा निर्वाचनको मतपरिणाम सार्वजनिक हुँदै गर्दा देशभर राष्ट्रिय स्वतन्त्र पार्टीका उम्मेदवारको पक्षमा परिणाम आइरहँदा केही निर्वाचन क्षेत्रमा भने उक्त पार्टीको पक्षमा सोचेजस्तो मत परेन । रास्वपाका १० उम्मेदवारको जमानत नै जफत भएको छ ।

जुम्लाबाट रास्वपा उम्मेदवार विनीता कठायतले सामाजिक सञ्जालमार्फत आफ्नो पक्षमा मत नआएपछि आक्रोश व्यक्त गर्दै लेखिन्, ‘कर्णाली र सुदूरपश्चिमका दुर्गम भेगले परिवर्तनको लहरलाई आत्मसात् गर्न नसक्नु किन होला ?’

२०७९ मा समानुपातिक निर्वाचन प्रणालीबाट सांसद बनेकी कठायत यस पटक भने जुम्लाबाट प्रत्यक्षतर्फ उम्मेदवार थिइन् । जहाँ उनको जमानत जफत भयो । राप्रपाका ज्ञानबहादुर शाही र नेकपाका नरेश भण्डारीबीच प्रतिस्पर्धा भएको जुम्लामा कांग्रेसका दीपबहादुर शाही तेस्रो र एमालेका शान्तिलाल महत चौथो भए ।

निवर्तमान सांसद कठायत भने जमानत जफतसहित पाँचौं नम्बरमा रहिन् । त्यसैले उनले आफ्नो जमानत जफत भएको आक्रोश सामाजिक सञ्जालमा नै व्यक्त गरिन् । ‘कर्णाली र सुदूरपश्चिमका दुर्गम भेगमा बस्ने हाम्रा दाजुभाइ–दिदीबहिनीले देशभरि उठेको परिवर्तनको लहरलाई अझै पूर्ण रूपमा आत्मसात् गर्न नसक्नु किन होला भन्ने प्रश्न आज मनमा गहिरो गरी उठ्छ । वर्षौंदेखि हामीले पिछडिएको पीडा बोकेका छौं । बाटो, शिक्षा, स्वास्थ्य, अवसर—हरेक क्षेत्रमा हामी पछि परेका छौं । तर अब केवल अरूलाई दोष दिएर मात्र बस्ने समय सकिएको छ,’ कठायतको आक्रोश थियो, ‘हामी किन पछाडि पर्‍यौं, भन्ने प्रश्नको उत्तर खोज्ने बेला आएको छ । आजको दिनमा पछाडि पर्नुको कारण हामीबाहेक अरू कोही हो भनेर मात्र दोष लगाउने ठाउँ अब बाँकी छैन ।’

देशका अधिकांश निर्वाचन क्षेत्र तथा जिल्लामा रास्वपा सभापति रवि लामिछाने र वरिष्ठ नेता बालेन्द्र शाह चुनावी प्रचारका क्रममा पुगेका थिए । जुम्लामा भने दुवै नेता पुगेनन् । जहाँ कठायत पराजित मात्रै बनिनन्, जमानत नै जफत भयो । उनले जुम्लामा ३९ हजार १ सय ७३ सदर मतमा ५ सय पनि कटाउन सकिनन् । यो निर्वाचन क्षेत्रमा जमानत जोगाउनका लागि उम्मेदवारले दस प्रतिशत अर्थात् ३ हजार ९ सय १८ मत ल्याउनुपर्नेमा कठायतको ४ सय २१ मत मात्र आयो । यहाँ कठायतसहित ६ उम्मेदवारको जमानत जफत भयो ।

नेकपाका संयोजक पुष्पकमल दाहाल निर्वाचित भएको रुकुम पूर्वमा पनि रास्वपाका उम्मेदवारको जमानत जफत भएको छ । यहाँ १८ हजार २ सय ४६ मत सदर भएकामा जमानत जोगाउनका लागि १ हजार ८ सय २५ रन आवश्यक पर्थ्यो । रुकुम पूर्वमा रास्वपा उम्मेदवार लखनकुमार थापाले ८ सय १९ मत मात्र प्राप्त गरेपछि जमानत जफत भयो ।

रास्वपाका डोल्पा उम्मेदवारको पनि जमानत जफत भएको छ । डोल्पामा जमानत जोगाउनका लागि १ हजार ५ सय ५१ मत आवश्यक पर्नेमा रास्वपा उम्मेदवार देवसिंह ऐडीले १ सय ८१ मत मात्र पाएका थिए । मुगुमा जमानत जोगाउन २ हजार १ सय २३ मत ल्याउनुपर्नेमा रास्वपाका भुवन टमटाले ५ सय ३० मत मात्र पाए । कालीकोटमा जमानत जोगाउनका लागि ३ हजार ९ सय ३८ मत ल्याउनुपर्नेमा रास्वपा उम्मेदवारले त्यो सीमा पार गर्न सकेनन् । रास्वपाका प्रकाश न्यौपानेको ३ हजार १ सय १ मत मात्र हुँदा जमानत जफत भयो ।

जाजरकोटमा रास्वपा उम्मेदवार राघव कार्कीको जमानत जफत भयो । यहाँ जमानत जोगाउन ५ हजार ७ सय ६७ मत आवश्यक पर्नेमा कार्कीको २ हजार ४ सय ७१ मत मात्रै आएको थियो । रुकुम पश्चिममा पनि रास्वपाको जमानत जफत भएको छ । यहाँ जमानत जोगाउन ५ हजार ९ सय ५३ मत प्राप्त गर्नुपर्नेमा रास्वपा उम्मेदवार मानबहादुर शाहीको ४ हजार ७६ मत मात्रै आएको थियो ।

हुम्लाबाट रास्वपा उम्मेदवार टासी ल्हान्जोमको जमानत जफत भयो । २१ हजार ९ सय ३५ मत सदर भएको हुम्लामा जमानत जोगाउन २ हजार १ सय ९४ मत आवश्यक पर्थ्यो । तर रास्वपा उम्मेदवार ल्हान्जोमको १ हजार ६४ मत मात्रै आयो । उनीसहित ४ जनाको जमानत जफत भएको छ ।

अछाम–१ मा रास्वपाका ओमप्रकाश रावलको जमानत जफत भएको छ । यो निर्वाचन क्षेत्रमा जमानत जोगाउनका लागि ३ हजार ३५ मत आवश्यक पर्नेमा रावलले १ हजार ७ सय ३९ मत मात्रै पाएका थिए ।

पूर्वी पहाडी जिल्ला ताप्लेजुङमा पनि रास्वपा उम्मेदवारको जमानत जफत भयो । जम्मा सदर मत २१ हजार ८ सय ९७ रहेको यो क्षेत्रमा एमालेका क्षितिज थेबे निर्वाचित हुँदा ४ हजार १ सय ५५ मत ल्याएका रास्वपाका वीरेन्द्र श्रेष्ठको जमानत जफत भएको हो ।

रास्वपाका पाँचथर उम्मेदवार महेन्द्रविक्रम थाम्सुहाङको पनि जमानत जफत भएको छ । यहाँ जमानत जोगाउनका लागि ६ हजार ६ सय ८९ मत ल्याउनुपर्नेमा थाम्सुहाङको ४ हजार १ सय ९७ मत मात्रै आयो । उनीसँगै यो क्षेत्रमा ११ उम्मेदवारको जमानत जफत भएको छ । सोलुखुम्बुमा पनि रास्वपा उम्मेदवार ऋषिधन थुलुङ राईको जमानत जफत भएको छ । जमानत जोगाउन ३ हजार ८ सय ४१ मत आवश्यक पर्नेमा रास्वपाका राईको ३ हजार ६ सय ४२ मत मात्रै आएको थियो ।

प्रतिनिधिसभा सदस्य निर्वाचनमा सदरको १० प्रतिशतभन्दा कम मत ल्याए उम्मेदवारको जमानत (धरौटी) जफत हुने व्यवस्था छ । २०७९ को प्रतिनिधिसभा निर्वाचनमा रास्वपाका ८२ उम्मेदवारको जमानत जफत भएको थियो ।